Prezidente IPB, Acácio Cardoso Amaral. Imajen Tatoli/Egas Cristóvão

DILI, 13 maiu 2022 (TATOLI)–Prezidente Institutu Politékniku Betano (IPB), Acácio Cardoso Amaral, hateten, konstrusaun edifísiu foun na’in maka Ministériu Ensinu Superior Siénsia no Kultura (MESSK).

“Ami hein de’it bainhira simu orientasaun hosi ministériu, ami prontu fasilita no koopera atu aselera prosesu ne’e ba oin. Antes ne’e ha’u ko’alia ona ho Ministru, nia dehan iha tempu badak sei halo lansamentu,” Prezidente IPB informa ba Agência Tatoli, iha Otél JL Vila, Fatuhada, sesta ne’e.

Notísia relevante: MESSK garante konstrusaun foun edifísiu IPB

Tuir Dirijente institutu ne’e, planu mestre edifísiu foun IPB prontu ona no planu konstrusaun sei harii sala aula, laboratóriu, dormitóriu ba estudante no dormitóriu ba funsionáriu sira.

Enkuantu, orsamentu ba konstrusaun ne’e rasik MESSK prevee ona hamutuk millaun $18, ne’ebé hetan ona aprovasaun.

Iha sorin seluk, Ministru Ensinu Superiór Siénsia no Kultura, Longuinhos dos Santos, garante molok tinan ne’e ramata projetu konstrusaun edifísiu foun IPB tenke realiza ona, tanba ne’e kontinua halo nafatin esforsu atu aselera serimónia lansamentu konstrusaun iha tempu besik.

“Ha’u hein hela atu asina karta aseitasaun, hafoin prosesu sira ne’e ramata ona maka ita sei aselera konstrusaun ne’e, ha’u fiar katak tempu besik ita sei realiza lansamentu tau fatuk dahuluk konstrusaun edifísiu,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here