Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Francisco Sony

DILI, 13 maiu 2022 (TATOLI)—Governu liuhosi reuniaun Konsellu Ministru (KM) extraordinária, sesta ne’e, aprova projetu dekretu-lei, ne’ebé aprezenta hosi Ministru Turizmu, Komérsiu no Indústria, José Lucas do Carmo da Silva, kona-ba rejime jurídiku parke komérsiu no indústria.

“Dekretu-lei ne’e hakarak determina prosedimentu administrativu implementasaun parke industriál iha Timor-Leste hodi regula rekezitu sira ba ezekusaun, infraestrutura no funsionamentu, inklui estrutura jestaun,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu, sesta ne’e.

Notísia relevante: MTKI kontrata kompañia Haberan inisia estudu viabilidade ba parke industriál Ulmera

Ho diploma ne’e, Governu hakarak fó impulsu ba kriasaun no estabelesimentu parke industriál no infraesturtura relasiona ho dezenvolvimentu ekonómiku nasaun hodi atrai investimentu no kria kampu serbisu.

Portavóz Governu dehan, atu implementa polítika ne’e presiza iha enkuadramentu legál, nune’e parke industriál la’ós jardín kuda aifunan maibé parke industriál ne’e hanesan komplexu industriál ne’ebé preparadu ona iha laran ho esgotu sira, asesu eletrisidade, morru no seguransa ba rai, atu nune’e bele fasilita investimentu.

“Parke industriál ne’e ho kontestu ideál atubele iha asesu di’ak ba bee, estrada no ba portu sira. Governu nia planu ne’e avansa nafatin, inisiativa ne’e sei avansa ho inisiativa projetu pilotu sira no sei halo iha munisípiu Liquiçá, Ulmera, antes ne’e haree ona fatin iha Maubara hafoin sei expande ba iha fatin sira seluk tan,” nia esplika.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here