Guarda prizionál iha Prizaun Suai komemora aniversáriu guarda prizionál ba dala-XXII iha Covalima. Imajen Tatoli /Celestina Teles.

COVALIMA, 13 maiu 2022 (TATOLI)–Governu liuhosi Ministériu Justisa (MJ) apresia servisu guarda prizionál iha Timor-Leste liu-liu guarda prizionál iha Prizaun Suai-Covalima, tanba dadur sira iha prizaun mesak ho kondisaun saúde di’ak.

“Ohin, loron espesiál ba ita-boot sira, ami la haluha ita-boot sira durante hala’o servisu makaas, dadur sira mós saúde di’ak no família simu ho kontente. Ami apresia ita-boot sira-nia servisu durante ne’e, ita-boot sira halo servisu loron-kalan ho permanente,” Vise-Ministru Justisa, José Edmundo Caetano, hateten liuhosi diskursu bainhira komemora aniversáriu Guarda Prizionál ba dala-XXII, iha prizaun Suai, sesta ne’e.

Governu apresia tanba guarda prizionál hala’o servisu, oras atu deskansa iha uma bainhira akontesimentu ruma, sira obrigatóriu hala’o servisu ho sistema rotasaun ba guarda prizionál hala’o funsaun seguransa.

Bazea ba lei, Guarda Prizionál ne’e servisu durante oras 24 nia laran, tanba ne’e husu kontinua servisu ho firme no transparensia hodi kumpre enkuadramentu legal.

Tanba, tuir nia, papel guarda prizionál importante mak lori dadur sira reintegra no moris iha sosiedade nia le’et, servisu ne’ebé todan tebes durante sira kumpre pena iha obrigasaun tenke asegura sira.

Reprezentante Administradór munisípiu Covalima, Francisco Mendonsa “Tatamero”, hato’o parabéns tanba selebra aniversáriu guarda prizionál ba dala-XXII 22, signifika instituisaun ne’e adultu no iha esperiénsia ona tanba prizaun Suai funsiona hahú iha 2017.

“Ha’u nu’udar ema Suai-oan apresia funsionamentu prizaun iha Suai-Covalima no agradese ba ita-nia Governu, prizaun Suai funsiona hodi bele absolve dadur sira,” nia dehan.

Autoridade ne’e husu guarda prizionál sira atu atende dadur sira ho profisionál no ho sentimentu umanu, tanba iha prizaun atu transforma dadur sira-nia mentalidade ho forma oioin atu sai ema-ne’ebé di’ak, nune’e bele integra ba komunidade.

Tuir observasaun ho ezisténsia guarda prizionál hodi halo movimentu atu redús sidadaun sira-ne’ebé iha intensaun ne’ebé ladi’ak hodi komete krime, tanba kontribui hosi guarda prizionál sira.

Enkuantu tuir dadus hosi Ministériu Justisa, dadur sira iha prizaun Becora, Gleno no Suai ne’e hamutuk 686 ho guarda prizionál hamutuk na’in-204.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here