Ministru Turizmu, Komérsiu no Indústria, José Lucas do Carmo da Silva no Ministru Agrikultura no Peska, Pedro Reis, haree hela produtu ne’ebé fa’an iha Loja do Povo, iha área Fomento II, Dili, kinta (12/05). Imajen/MTKI

DILI, 13 maiu 2022 (TATOLI)–Governu liuhosi Ministériu Turizmu, Komérsiu no Indústria (MTKI) hamutuk ho Ministéru Agrikultura no Peska (MAP), semana ne’e, halo lansamentu ‘Loja do Povo’, iha área Fomento II, Dili.

Ministru Turizmu, Komérsiu no Indústria, José Lucas do Carmo da Silva, hateten, Governu estabelese loja ne’e objetivu atu kria merkadu ba produtu lokál, atu asegura ai-han iha rai-laran no promove substituisaun produtu lokál sira tanba Loja do Povo hanesan instrumentu ida atu utiliza ba intervensaun merkadu no kontrolu infrasaun iha rai-laran. 

Lansamentu Loja do Povo , iha área Fomento II, Dili, kinta (12/05). Imajen/MTKI

“VIII Governu estabelese Loja do Povo atu kria alternativa di’ak liu hodi diversifika ekonomia liuhosi setór produtivu, atu dezenvolve ekonomia komérsiu lokál no nasionál ne’ebé reziliente, inkluzivu, diversifikadu no sustentável,” Ministru dehan durante serimónia lansamentu loja, hanesan haktuir iha nota ne’ebé Agência Tatoli asesu, sesta ne’e.

Notísia relevante: MAP hahú hatún presu foos-rai iha Loja Agrikultór iha Dili

Governante ne’e konsidera, estabelesimentu komersiál ne’e importante tebes tanba durante ne’e Timor-Leste jeográfikamente lokaliza iha área ne’ebé favorese tebes, iha rai no bee sufsiente atu dezenvolve setór agrikultór.

“Timor-Leste potensiál tebes ba setór produtivu sira no presiza polítika atubele asegura produsaun hosi setór produtivu sira hotu. VIII Governu konsidera Loja do Povo importante tebes atubele dezenvolve setór produtivu hodi diversifika ekonomia ne’ebé mak sustentável,” nia reforsa.

Iha fatin hanesan, Prezidente Koopertiva Kamponezes Maubere (CCM, sigla portugés), Almerindo Oliveira das Silva, agradese ba Governu ne’ebé fó apoiu tomak ba sira atu halo servisu, tanba durante tinan-20 nia-laran Timor-Leste nia konsumu nasionál depende ba ai-han importasaun.

Ho nune’e, MTKI hamutuk ho CCM estabelese Loja do Povo atu promove no dezenvolve setór produtivu sira, nune’e Timor-Leste labele depende de’it ba ai-han importasaun.

Aleinde ne’e, nia konsidera, Timor-Leste presiza kria loja ne’e atu tau konsumu rai-laran sai hanesan pilotu importante ba konsumu terseriál, tanba tinan barak mak kamponez sira prodús ai-han, maibé laiha parte relevante ruma atu tau atensaun nune’e ai-han balun estraga.

“Tanba ne’e, liuhosi Loja do Povo ne’e bele sai alternativa di’ak liu hodi diversifika ekonomia liuhosi setór produtivu sira no atu dezenvolve ekonomia komérsiu lokál no nasionál,” nia tenik.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here