Diretór Ezekutivu CEPAD, João Boavida. Imajen Tatoli/Egas Cristóvão.

DILI, 13 maiu 2022 (TATOLI)—Centro de Estudos para Paz e Desenvolvimento (CEPAD) hamutuk ho Grupu Trabailu Liberdade Asesu ba Informasaun ne’ebé reprezenta hosi Judisial System Monitoring Program (JSMP), kuarta ne’e, fó formasaun ba organizasaun Sosiedade Sivil, kona-ba “Liberdade asesu ba informasaun no advokasaun,” hahú hosi 11 to’o 12 maiu 2022.

Diretór Ezekutivu CEPAD, João Boavida, hateten atividade ne’e hala’o nu’udar parte ida hosi programa reforsa akuntabilidade Governu ni’an ba COVID-19, liuhosi Promove liberdade no asesu ba informasaun iha Timor-Leste, ho apoiu finansiamentu hosi União Europeia iha Timor-Leste, nune’e bele suporta organizasaun Sosiedade Sivil atu sai ajénsia ba mudansa ho efetivu hodi promove Direitus Umanus.

“Objetivu programa ne’e, mak atu promove no hakbiit koñesimentu sidadaun ni’an liu-liu maluk feto sira kona-ba sira-nia direitu atu husu no asesu informasaun ba Instituisaun Estadu ne’ebé relevante, hodi hakbiit sira-nia moris liuhosi asesu ba fasilidade saúde, edukasaun no rekursu seluk ne’ebé mak relevante,” refere komunikadu imprens ane’ebé Agência Tatoli asesu.

Atu haforsa liután advokásia ba asuntu ne’e mak CEPAD hala’o formasaun ba reprezentante organizasaun Sosiedade Sivil, atu oinsá bele hatutan informasaun hirak ne’e liuhosi implementasaun planu no programa ne’ebé iha ba komunidade iha baze no hamutuk halo movimentu advokásia ba lejislasaun Liberdade Asesu ba Informasaun.

Diretór Ezekutivu CEPAD, João Boavida, katak iha kontestu Timor-Leste ida agora importante ba organizasaun Sosiedade Sivil sira, atu hamutuk iha esforsu koletivu ba defende Direitu Umanu liuhosi hakbiit ida-idak nia koñesimentu, kona-ba oinsá prátika asesu ba informasaun no hafahe informasaun ba malu liuhosi kanál no meiu ne’ebé kredivel.

Diretora JSMP, Ana Paula Marçal, hateten advokasia nu’udar asaun organizadu ho aproximasaun kolaborativu hosi instituisaun oioin ho objetivu ida de’it atu atinje objetivu finál ne’ebé iha.

“Entaun, liga ho formasaun ida-ne’e, ita bele tau esforsu hamutuk hodi advoga ba sidadaun hotu iha rai ida-ne’e, atu asesu ba informasaun ida lolos hosi instituisaun Estadu,” nia dehan.

Partisipante iha formasaun ne’e hamutuk (24) ne’ebé kompostu hosi feto 13 no mane 11, ne’ebé mai hosi organizasaun Sosiedade Sivil sira hanesan Raes Hadomi Timor Oan (RHTO), Luta Hamutuk, Belun, Conselho Nacional Juventude Timor-Leste (CNJTL-sigla portugés), Forum ONG Timor-Leste (FONGTIL), Comisaun Justisa e Paz Diocese Dili, Civil Society Education Partnership (CSEP), ARCOIRIS-Timor-Leste, Action for Change Foundation (ACF), CAUCUS, MOFE Timor-Leste, Juventude Dezenvolvimentu Nasional (JDN), Feto iha Kbiit Servisu Hamutuk (FKSH), HIVOS Timor-Leste no Sentru Direitus Humanus (HRC-UNTL).

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here