Autoridade RAEOA no PNDS inaugura projetu UKL iha Nítibe. Imajen Tatoli/Abílio Elo Nini.

OÉ-CUSSE, 13 maiu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) hamutuk ho Programa Nasionál Dezenvolvimentu Suku (PNDS), kinta ne’e inaugura projetu Uma Kbiit Laek (UKL) iha aldeia Kuantua, suku Usitaku, sub-rejiaun Nítibe.

Sekretáriu Rejionál ba Asuntu Administrasaun no Estatál, Martinho Abani Elu, fó parabéns ba VIII Governu Konstitusionál, tanba kria polítika apoiu Uma Kbiit Laek, ba komunidade kbiit laek sira iha teritóriu nasionál inklui Oé-Cusse.

“Ha’u agradese ba ekipa PNDS, ekipa jestaun suku KPA hamutuk ho autoridade komunitáriu suku Usitaku ho nia aldeia sira, liuhosi koordenasaun ho esforsu konsege finaliza kontrusaun projetu Uma Kbiit Laek ne’e to’o ohin ita inaugura,” nia orgullu.

Reprezentante Prezidente Autoridade RAEOA atuál Sekretáriu Rejionál ba Asuntu Sosiál, Maximinano Neno, apela ba benefisiáriu sira atu uza fasilidade ne’e ho di’ak labele estragu no labele fó aluga.

“Uma hirak-ne’e Governu mak fasilita ba komunidade ne’ebé laiha kbiit, tán ne’e ha’u husu uza didi’ak tanba ne’e rikusoin ida iha suku, no labele fó aluga atu hetan tán osan, tanba Guvernu nia programa fasilita laiha intensaun polítika iha laran, entaun uza didi’ak, labale estraga, hodi kontinua furak hosi jerasaun ba jerasaun,” nia fó hanoin.

Diretór PNDS RAEOA, Sebastião Tanesi, informa, orsamentu ba Uma Kbiit Laek unidade rua ne’e nia médida 61 m2 komposta hosi kuartu tolu (3), sala vizíta ida (1), sala kuziña ida (1), kompleta ho eskada ema ho defisiensia nian, no kada uma nia valór orsamentu hamutuk $17,000.

“iha Oé-Cusse, ita inaugura unidade 10, hela 26 tanba projetu UKL iha Oé-Cusse hamutuk 36, agora iha suku lima remata ona, hela suku 13 nia progresu balu atinje ona 90%, balu hasa’e ona batako no balu hasa’e ona sinta leten, ita garante no espera iha maiu ne’e nia laran ita sei halo inaugurasaun ba unidade hirak-ne’e,” nia informa.

Xefe suku Usitaku, Hiliário Babo, agradese ba Governu no autoridade liuhosi programa PNDS tanba akompaña prosesu ne’e to’o remata.

RAEOA hetan projetu UKL hamutuk 36 ba suku 18, maibé daudaun ne’e unidade 10 iha suku lima hanesan, suku Cunha, Bobometo, Suni-ufe, Bene-Ufe no Uistaku konklui ona, hela unidade 26 maka seidauk iha suku 13.

Entretantu, iha tinan fiskál 2021 Governu harii Uma Kbiit Laek hamutuk unidade-1.254 iha suku 424 iha teritóriu nasionál ho montante orsamentu hamutuk $25,000.000 ho kustu ba kada uma purvolta $14,000 to’o $17,000.

Projetu Uma Kbiit Laek, ne’ebé kontrui komposta hosi modelu rua, modelu 48 m2, inklui kuartu tolu (3), sala vizíta ida (1) no dapur ida (1), modelu 37 m2 inklui kuartu rua (2), sala vizita ida (1) no dapur ida (1).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here