Autoridade RAEOA nomea Julmira da Silva, lidera SAS Oé-Cusse. Imajen Tatoli/Abílio Elo Nini.

OÉ-CUSSE, 13 maiu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), nomea ofisiál tékniku dezeñu, Julmira da Silva, lidera Deprtamentu Servisu Água no Saneamentu (SAS) iha Diresaun Rejionál Infraestrutura (DRI) nu’udar Diretora SAS hodi troka diretór sesante, Gil Monteiro de Sousa.

Nomeasaun ne’e bazea númeru ofísiu 11/2022/PA RAEOA-ZEESM TL, no iha koñesimentu ba Prezidente Konsellu Diretivu Imprensa Nasionál Timor-Leste, Institutu Públiku, Jaime S.M.C Correia.

Efeitu públikasaun baze legál ártigu 40 alinea b, no dekretu lei númeru 5/2015, 22 janeiru, aprovasaun estatutu RAEOA nian. No konsidera artigu 9 númeru 2 estatutu RAEOA kona-ba subtituisaun funsionáriu públiku.

Nune’e bazea despaxu númeru 07/IV/2022/PA RAEOA-ZEESM TL, ezonera funsionáriu, Gil Monteiro de Sousa, asume kargu Xefe Departamentu Gestaun Água no Saneamentu, Sekretáriu Rejionál Asuntu Finansa, ba títulu tranzitóriu ba tékniku espesializadu ba área Jestaun Água Saneamentu, atu ezekuta funsaun hanesan koordenadór servisu planeamentu nian.

Nomea funsionáriu Julmira da Silva, asumi kargu Xefe Departamentu Gestaun Água no Saneamentu, ne’ebé aprova hosi Prezidente Autoridade RAEOA-ZEESM TL, Arsénio Paixão Bano.

Hafoin simu pose iha semana kotuk, Julmira da Silva, iha nia kompromisu promete, sei serbisu hamutuk ho dirijente másimu iha autoridade RAEOA hodi garante progresu servisu iha água saneamentu iha área úrbana no área remota.

“Ha’u asumi kargu ne’e lidera servisu água saneamentu, sei esforsu tuir ha’u-nia kapasidade ne’ebé iha, no sei serbisu hamutuk ho funsionáriu sira hotu iha SAS, no promove kooperasaun di’ak ho autoridade másimu iha RAEOA no diresaun Rejionál Infraestrura atu haree servisu bee-moos iha área rurál ho área úrbana,” Diretóra SAS Julmira da Silva, hatete iha Oé-Cusse, sesta ne’e.

“ha’u iha planu no programa ba servisu água saneamentu nian, iha área úrbana no remota, tanba iha área úrbana autoridade instala ona projetu barak ba bee-moos, nune’e ha’u sei hametin liña koordenasaun ho ha’u-nia dirijente másimu, diretór diresaun infraestrura ho prezidente autoridade, ko’alia kona-ba planu no programa ba implementasaun projetu bee-moos nian hodi asesu ba komunidade,” nia promete.

Diretór sesante SAS, Gil da Costa, promete kontinua serbisu hamutuk ho diretra foun, atu lidera instituisaun Estadu ne’e ba oin hodi dezenvolve Oé-Cusse iha asuntu bee-moos nian.

“Kestaun atu sa’e tún la importante, maibé importante maka serbisu hamutuk, unidade liuhosi liña koordenasaun hosi mellora servisu água saneamentu iha territóriu Oé-Cusse,” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here