Treinadór sira hosi klubu 13 partisipa enkontru ne'ebé organiza hosi Asosiasaun Futeból Bobonaro. Imajen Tatoli/Sérgio da Cruz.

BOBONARO, 13 maiu 2022 (TATOLI) – Asosiasaun Futeból Bobonaro (AFB), sesta ne’e realiza Tecnical Metting ho treinadór no ofisiál treinadór sira hamutuk 13 ne’ebé rejista iha asosiasaun atu kompete iha jogu futeból sub-23 époka 2022 nian.

Iha enkonrtru ne’e, AFB fó kedas oportunidade ba treinadór klubu sira dada númeru sorteiu no rezultadu ne’e hatudu katak klubu Ex Kodim sei kontra FC Cruz iha abertura kompetisaun futeból ne’ebé sei realiza iha kampu futeból Maliana, iha loron sábadu (14/05) lokraik.

Klubu ne’ebé rejista ona iha asosiasaun no preparadu ona atu kompete iha eventu ne’e hamutuk 13 mai hosi postu administrativu Atabae, Cailaco, Bobonaro no barak liu mai hosi postu Maliana.

Hosi klubu hirak-ne’e fahe grupu haat mak hanesan (A) EX Kodim, Cruz FC, AS Fition no São Miguel.

Grupu (B) Focadioma, Maliana United (MU), Soboai, grupu (C) mak hanesan River Bulobu, Ramber, Memoria no grupu (D) Jalagovi, Monumentu no Madiran.

Treinadór FC Cruz hosi postu administrativu Cailaco, Laurentino dos Santos. Imajen Tatoli/Sérgio da Cruz.

Treinadór FC Cruz hosi postu administrativu Cailaco, Laurentino dos Santos, garante katak ninia jogador sira sei hatudu jogu ho di’ak, tanba molok atu mai rejista preparasaun tátika no fíziku durante fulan ida resin.

“Ha’u hanoin ami laiha dúvida ba jogu abertura aban, tanba ami-nia preparasaun másimu tebes, ami otimista katak aban ami sei lori pontu tolu ba Cailaco, tanba ha’u-nia jogadór sira durante ne’e elabora sira-nia skiil ne’ebé iha kampu másimu tebes, ne’e duni ha’u garantia aban ami sei manán,” nia informa ba Tatoli, iha Holsa, Maliana, sesta ne’e.

Sekretáriu Jerál AFB, António Soares, hataeten kada tinan sempre realiza eventu ne’e atu identifika jogadór potensiál sira iha nível postu to’o suku ne’ebé durante ne’e subar hela sira-nia talentu iha mundu futeból.

Nia akresenta, liuhosi eventu sira hanesan ne’e mak bele identifika jogadór kualidade, nune’e ba futuru bele iha mentalidade di’ak atu promove s iha klubu boot sira-ne’ebé  partisipa ona liga iha nasionál no internasionál.

Sekretáriu Jerál Asosiasaun Futeból Bobonaro (AFB), António Soares. Imajen Tatoli/Sérgio da Cruz.

“Ha’u husu ba jogador sira atu hatudu disiplina iha kampu, tanba ita mai joga bola, la’ós mai joga malu, maibé iha kesalahan balun, hanesan ain-lima kona malu ne’e normál tamba futeból ne’e ema dehan You Can Play, maibé ami espera ita-nia jogador sira-ne’e bele iha konsiénsia di’ak hatudu joga tuir regra,” nia apela.

Fundu ba realizasaun eventu ne’e mai hosi rejistrasaun kada klubu $25 dolar no FFTL kada fulan rihun $1 no orsamentu ne’e aloka hodi atende prosesu administrasaun no nesesidade asosiasaun nia.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here