Xefe suku Ritabou, Maximiano dos Santos Araújo. Imajen Agência Tatoli /Sérgio da Cruz.

BOBONARO, 12 maiu 2022 (TATOLI) – Komunidade uma-kain 12 iha suku Ritabou, postu administratrivu Maliana, munisípiu Bobonaro, sai benifisiáriu ba implementasaun programa Uma Kbiit Laek (UKL) faze daruak tinan fiskál 2022.

Xefe suku Ritabou, Maximiano dos Santos Aroujo, hateten uma-kain 12 ne’e sai benifisiáriu hafoin ekipa verfikasaun hosi Programa Nasionál Dezembolimentu suku (PNDS) munisípiu Bobonaro akompaña hosi Ekipa Jestaun Suku (EJS), halo verifikasaun lubuk ida no deside katak família hirak-ne’e prienxe duni rekizitu matadalan programa Uma Kbiit Laek nian.

Família hirak-ne’e mai hosi aldeia haat mak hanesan; Daitete, Ma-hui, Uat no Maganutu. Enkuantu kada aldeia alvu sei hetan uma u nidade tolu ho medida  48 m2 ho totál kuartu tolu, sala vizita ida, dapur no kompletu ho hariis-fatin. Nune’e mós balun ho medida 37 m2 totál kuartu rua, sala vizita ida, dapur kompletu ho haris fatin.

“Família 12 ne’e sira balun kbiit laek, depois balun faluk duni, ekipa sira PNDS munisípiu ba observa tiha fatin ona, depois fatin benifisiáriu sira na’in rasik mak aterru ona, hein de’it implementa, mas to’o agora seidauk iha informasaun,” nia informa ba Tatoli, iha Maliana, kinta ne’e.

“Ha’u hanoin programa ne’e governu tenke iha kontinuasaun tanba ita ko’alia kbiit laek la’os de’it sira-ne’ebé hetan ona, maibé barak mak sei iha tanba bazeia ba matadalan aldeia alvu uma tolu deit, mais ita atu foti hotu ha’u hanoin barak tebes,” nia katak.

Tuir dadus monografia suku Ritabou iha aldeia 12 ho totál populasaun 7.881 hosi totál xefe família 1.600-resin.

Joranlista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan