Komputadór no printer iha EBC BECO-Covalima ne’ebé avaria. Imajen Tatoli/Celestina Teles.

COVALIMA, 12 maiu 2022 (TATOLI)—Sasán eletrónika ne’ebé apoiu hosi Ministériu Eduksaun Juventude no Desportu (MEJD) ba Eskola Bázika Sentrál Beco (EBC, sigla portugés) ne’e, agora avaria hodi fó impaktu ba profesór sira atu hala’o servisu administrasaun liu-liu matéria ezame ba estudante sira iha eskola.

Diretor Escola Básica Central (EBC) Beco, Quintinho Quintão, hateten komputadór no printer ne’ebé MEJD fó apoiu iha tinan 2012 no iha tinan 2019, hanesan komputadór no printer ne’e avaria on, nune’e profesór sira print no ketik matéria iha rentál bainhira eskola iha osan selu kedas no laiha osan mak eskola tenke deve.

“Hahú tinan 2019 to’o agora, ami hasoru problema hodi hala’o servisu administrasaun no prepara matéria ezame ba estudante-sira, tanba komputadór no printer ne’ebé apoiu hosi MEJD ne’e avaria ona. Nune’e, matéria ezame ba estudante sira-ne’e, ami print out de’it iha rental,” Quintinho Quintão hato’o ba Agência Tatoli, iha nia knar fatin EBC Beco, kinta ne’e.

Situasaun ida-ne’e obrida profesór sira tenke print out matéria ezame iha rental, bainhira prefesór sira iha osan selu kedas ka se lae profesór sira deve de’it hafoin osan konsesaun ekolár sai mak eskola selu ba rental, maibé orsamentu refere la sufisiente atu hadi’a komputadór.

“Ami rasik buka ona ona IT sira atu hadi’a komputadór ne’ebé mak avaria maibé sira husu kustu $1000.00, entaun di’akliu ami sosa de’it foun hodi uza orsamentu konsesaun eskolar la’ós atu hadia de’it komputadór,” nia dehan.

Maske problema ne’e diretor eskola rasik hato’o ona ba servisu edukasaun munisípiu Covalima no haree direta iha eskola, maibé to’o ohin loron seidauk iha rezultadu.

Toál Estudante iha eskola bázika Centrál (EBC) Beco ne’ebe lokaliza iha postu administrativu Suai Vila hamutuk 254 ho profesór permanente no kontratadu no voluntáriu 25.

Diretór Servisu Edukasaun Covalima, Rui Suni Seran esplika, problema komputadór avaria iha Eskola Bázica Central (EBC) Beco, maibé Servisu Edukasaun seidauk iha informaun no sira iha orsamentu.

“Ami seidauk iha informasaun no bainhira kompatadór avaria orsamentu ne’e la’ós iha edukasaun maibé sira iha osan rasik no ha’u sei haree no bolu diretór ne’e,” nia hateten.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here