Ministru Asuntu Kombatente Libertasaun Nasionál, Julio Sarmento da Costa ‘Meta Mali’. Imajen TATOLI/Egas Cristóvão

DILI, 12 maiu 2022 (TATOLI)—Ministru Asuntu Kombatente Libertasaun Nasionál (MAKLN), Júlio da Costa, hateten Orsamentu Retifikativu (OR) millaun $2,5 ba MAKLN atu halibur no haloot restu mortál sira-ne’ebé rai hela osoáriu sira iha territóriu nasionál.

Notísia Relevante: PN aprova adisionál millaun $2,5 ba MAKLN haloot restu mortál

“Orsamentu ne’ebé mai tan millaun $2,5 ne’e ami halo exersísiu hodi foti tan restu mortál balun hanesan iha Ainaro, Ermera, Natarbora, munisípiu Manatuto nian no haloot restu mortál sira-ne’ebé rai hela iha osoáriu iha territóriu nasionál,” Governante ne’e hateten ba Agência Tatoli iha Parlamentu Nasionál, Dili, kuarta ne’e.

Tanba, nia dehan, restu mortál iha fatin ne’ebé mak identifikadu ona ne’e hakarak lakohi molok aprova Orsamentu Retifikativu ne’e, ministériu iha iha ona faze preparasaun atu hakohi.

“Orsamentu Retifikativu millaun $2,5 ne’e sei ba hotu ne’ebá no balun sei loke tan konkursu foun iha 2022,” nia dehan.

Restu mortál desde tinan 2008 mai to’o agora hamutuk 14,000-resin no hosi totál ne’e iha tinan 2022 bazea ba planu atu hakohi hamutuk 1,000-resin no sei gasta millaun $2,5.

Jornalista: Osória Marques

Editór: Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here