Ministra Solidariedade Sosiál no Inkluzaun (MSSI), Armanda Berta dos Santos. Imajen/Egas Cristovão

DILI, 12 maiu 2022 (TATOLI)–Ministra Solidariedade Sosiál no Inkuzaun (MSSI) no Vise Primeira Ministra, hatete tinan 2022, MSSI apoiu orsamentu millaun $1 ba Instituisaun Seguransa Sosiál (ISS) hodi halo servisu asisténsia sosiál ba ema vulnerável sira iha Timor-Leste.

“Ohin ita halo akordu ho Instituisaun Solidariedade Sosiál sira-ne’ebé servisu fó asisténsia sosiál ho nia osan miliaun $1 hodi halo atendementu sosiál,” MSSI hateten ba jornalista sira, hafoin asina akordu ho ISS, iha salaun MSSI Caicoli, Dili, kinta ne’e.

Nia dehan, osan ne’ebé MSSI aloka menus liu iha tinan ne’e maibé ida-ne’e realidade ne’ebé akontese iha ministériu ne’e.

“Hanesan ita hotu hatene katak, iha tinan ida-ne’e no tinan oin mai ita sei gasta konsentrasaun ba ita-nia responsabilidade no mós ba festa demokrasia iha ita-nia rain. Ámbiente ne’ebé bele dehan difisil, liu-liu tanba ita foin liu dadauk elisaun prezidensiál 2022 no povu hili ona ita-nia Prezidente Repúblika foun, ne’ebé iha tempu badak sei simu posse iha 20 maiu 2022,” nia dehan.

Maske nune’e, Instituisaun sira-ne’ebé prezente dadauk la husik le’et de’it sira-nia responsabilidade no nafatin atende sidadaun vulnerabel sira-ne’ebé presiza duni prezensa Estadu nian liuhosi sira-nia atendimentu.

“Ida-ne’e atu garante katak prosesu sira-ne’e hotu la’o tuir padraun enkuadramentu legál, no ISS nu’udar implementadór, tan ne’e mak ita presiza iha kooperasaun di’ak no garante akuntabilidade ho responsabilidade ne’ebé di’ak,” nia dehan.

Iha biban ida ne’e, MSSI halo esforsu atu bele mellora mekanizmu hotu ne’ebé nakait ba apoiu no asisténsia ba parseiru sira iha tempu oin mai, ho nune’e MSSI bele fortalese instituisaun no ikus mai bele hatudu rezultadu ho kualidade ne’ebé aas.

Ministériu konsidera de’it ISS hamutuk 29 ne’ebé mak hetan atribuisaun apoiu finansiamentu atu nafatin garante sustentabilidade iha implementasaun programa ne’ebé define ona.

“Maibé, ha’u enkoraja nafatin entidade Solidariedade Sosiál sira hotu, atu hatudu nafatin responsabilidade institusionál hodi hatuur uluk interrese sira-ne’ebé kbiit laek nian, lahó diskriminasaun maibé ho espiritu ida de’it katak laiha fatin atu husik ema ruma iha kotuk. Ha’u fiar katak maske ho limitasaun finansiál iha tinan ida-ne’e, sei la hamihis kualidade atendimentu ne’ebé profisional, transparante, efisiente no efikas nomós ho kuantifikasaun ne’ebé rasionál iha despesa sira,” nia enkoraja.

Instituisaun Solidaridade Sosiál 29 ne’ebé hetan subvensaun hosi MSSI mak hanesan Fundasaun Uma Paz Atu Serví, Sentru Komunidade Canosiana Saõ Miguel Lospalos, Fundasaun Saõ José, Asosiasaun Halibur Defisiénsia Matan Timor-Leste, Fundasaun Ahisaun.

Nune’e mós, ba FOKUPERS Uma-Mahon Maria Tapo, Luzeiro Uma-Mahon Lospalos, no Fundasaun Irmãs Reparadores Nossa Senhora de Fátima (Memo Maliana), Sentru Sosiál Imaculada Conceição Lautém, Sentru Esperansa ba Feto, Klibur Domin, Fundasaun Knua Haberan Komunidade, Fundasaun Don Bosco Timor-Leste (Orfanatu Santa Terezinha Quelicai, Kongregasaun Institutu Sekular Alma, Fundasaun Don Bosco Timor-Leste (Orfanatu Saõ Paulo Lospalos), Fundasaun Ordem Hospitaleira de Saõ João de Deus Laclubar no seluk tan.

Diretór Ezekuitvu Asosiasaun Halibur Defisiénsia Matan Timor-Leste (AHMDTL), Gaspar Afonso, hateten ba tinan ne’e AHDMTL simu osan hamutuk $44,504.046 no tinan kotuk simu osan $603,296.058.

“Tinan ne’e, ami labele halo atividade barak tanba osan kiik tebes entaun osan hirak-ne’e ami hodi halo de’it ba aluga fatin ba labarik sira no nesesita nesesidade AHDMTL,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here