Atividade iha Portu Dili. Imajen Tatoli/Egas Cristóvão

DILI, 12 maiu 2022 (TATOLI)—Ministru Finansa (MF), Rui Gomes, simu vizita kortezia hosi parseiru dezenvolvimentu, kinta ne’e, hodi diskute kona-ba asisténsia téknika hosi United States Agency for International Development (USAID) Timor-Leste ba projetu reforma aduaneira ne’ebé hahú iha juñu 2017 no ramata ona iha setembru 2021.

Entidade ne’ebé partisipa iha enkontru ne’e mak hanesan Enkaregadu Negósiu Embaixada Estadu Unidu Amérika (EUA) iha Timor-Leste, Tom Daley, Diretora Misaun States Agency for International Development (USAID) iha Timor-Leste, Zema Semunegus, Espesialista Jestaun Projetu USAID Timor-Leste ba programa Governasaun no Demokrasia, Ana Gusmão Guterres, no Komisáriu Autoridade Aduaneira, José de Fátima Abílio.

“Durante tinan haat-nia laran, projetu reforma aduaneira konsege ajuda redús atrazu sira iha tempu importasaun sasán 65% no tempu esportasaun sasán 74%, uzu pista verde (Green Land) sa’e ba 71%, estabelese liña direta alfandegáriu (Customs Hotline 12200), lansa portál komérsiu alfándega, no aprova ona planu estratéjiku Autoridade Aduaneira ba tinan-lima,” refere nota ne’ebé Agência Tatoli asesu hosi Gabinete Ministériu Finansa, kinta ne’e.

Notísia relevante: Lansamentu janela únika, ajuda reforma fiskál no jestaun finansa públika

Nune’e, ho progresu ne’ebé iha, parte rua mós diskute atu kontinua hametin liután serbisu parseria ne’e liuhosi dezenvolve atividade foun sira.

Durante reuniaun ne’e, parte rua mós diskute projetu Parseria Públiku-Privadu (PPP) Cristo Rei ho kustu millaun $3, ne’ebé mak daudaun ne’e iha ona faze finalizasaun estudu viabilidade no Projetu PPP Portu Dili ho kustu estimativu millaun $156, ne’ebé iha ona faze estudu viabilidade, ne’ebé projetu rua hetan asisténsia tékniku hosi USAID’s Tourism For All Project.

Tuir planu, lansamentu aprovizionamentu ba projetu PPP rua ne’e sei realiza iha tinan ne’e nia laran.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here