Ministru Edukasaun Juventude no Desportu, Armindo Maia, entrega fundu kiik ba responsável eskola sira iha Viqueque, iha salaun Servisu Edukasaun Viqueque, kinta (13/05). Imajen Tatoli/Vitorino Lopes da Costa

VIQUEQUE, 12 maiu 2022 (TATOLI)–Ministru Edukasaun Juventude no Desportu (MEJD), Armindo Maia, kinta ne’e, kontinua distribui fundu kiik ba eskola hamutuk 35 hodi dada bee ba pré-eskolár no ensinu báziku sira iha munisípiu Viqueque.

“Ita distribui tan fundu kiik ba faze daruak, ba eskola hamutuk 35 iha munisípiu Viqueque hodi uza osan ne’e dada bee ba eskola, inklui distribui spicker no USB ba pré-eskolár sira,” Ministru hateten liuhosi ninia diskursu, iha serimónia distribuisaun fundu kiik, iha salaun Servisu Edukasaun Viqueque, kinta ne’e.

Notísia relevante: MEJD instala bee-moos iha Eskola EBF Wetalik Viqueque

MEJD hetan fundu kiik hosi parseiru sira hodi fó apoiu ba eskola sira, ne’ebé fundu ne’e hosi tinan 2021 hodi halo prevensaun ba moras COVID-19.

“Ho nune’e, Ministériu Edukasaun Juventude no Desportu deside halo medida apoiu ba máskara no apoiu eskola sira dada bee no sosa tanki atu proteje labarik sira hosi COVID-19,” nia akresenta.

Iha fatin hanesan, Administradór munisípiu Viqueque, Januário Soares ‘Bolly’, agradese ba ministru tanba bele fó apoiu fundu kiik ba eskola sira iha faze daruak nian hodi eskola sira bele uza fundu ne’e dada bee ba eskola.

“Espera hosi apoiu ne’ebé mai hosi MEJD bele oferese ba eskola sira uza hodi implementa programa dada bee-moos ba eskola hamutuk 35 iha Viqueque,” nia tenik.

Iha biban ne’e, Diretór Servisu Edukasaun munisípiu Viqueque, Emídio Amaral, relata implementasaun fundu kiik iha faze dahuluk ba eskola hamutuk 28 no agora eskola hamutuk 35 ho montante $87.635 iha faze daruak hodi kanaliza bee ba eskola.

“Iha faze daruak ne’e, ita-nia eskola pré-eskolár neen no ensinu báziku 29. Ami agradese ba ministru ne’ebé mai Viqueque hodi distribui direta fundu kiik ba eskola sira,” nia dehan.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here