Administradór Postu Administrativu Zumalai, Munisípiu Covalima Rui dos Santos. Imajen Tatoli/Celestina Teles.

COVALIMA, 12 maiu 2022 (TATOLI)–Administradór Postu Administrativu Zumalai, Rui dos Santos informa, komunidade suku tolu iha postu administrativu Zumalai seidauk asesu ba eletrisidade no estrada.

“Komunidade iha postu administrativu ita bele hateten katak suku tolu ne’ebé mak seidauk asesu ba eletrsidade no estrada, hanesan suku Lour besik iha Zumalai Vila, Mape no Usecai aleinde iha suku Fatuleto falta de’it ona aldeia Bee-Ata mós seidauk asesu eletrisidade,” Administradór ne’e inform aba Agência Tatoli, iha postu administrativu Zumalai, kinta ne’e.

Nune’e mós, komunidade ne’ebé seidauk asesu estrada tanba iha suku Lour estrada hosi Zumalai to’o de’it iha sede suku, estrada iha suku Mape projetu ILO hadi’a estrada ho situasaun udan sobu estraga nomós estrada iha suku Usecai ne’e aat loos.

Maske Governu liuhosi IGE loke ona dalan iha parte balun maibé seidauk finaliza tanba IGE sei ba iha fatin seluk no bainbihira mak atu hahú fali, nu’udar autoridade lokál seidauk iha informasaun.

Aleinde estrada hosi Zumalai liga ba suku sira-ne’ebé estrada aat, maibé estrada protokolu hosi Zumalai to’o iha Rai Fila no Rai Fila to’o fronteira ho Ainaro Casa ne’e kondisaun estrada ladi’ak.

“Estrada hahú hosi Zumalai Vila to’o de’it iha Rai Fila maibé to’o iha Fatuk Makerek estrada aat, ita-nia na’i-ulun sira mós liu ba-mai hatene kondisaun dalan aat ne’e maibé la halo asaun,” nia informa.

Kona-ba estrada aat, nia dehan, tanba komunidade hosi suku Lour, Raimea, Fatuleto no Mape ne’e hela kahur malu entaun, entaun situasaun refere administradór mós hato’o ona ba Ministériu Obra Públika liuhosi telefone.

“Kondisaun estrada, ha’u ko’alia ona ho Ministériu Obra Públika, Abel Pires, mós ha’u kontaktu ona Ministru liuhosi telefone,” nia hateten.

Postu administrativu Zumalai kompostu  hosi  suku  Usecai, Mape, Lour, Lepo, Zulo, Raimea, Tashilin no Zulo.

Jornalista : Celestina Teles

Editór       : Cancio Ximenes.

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here