Embaixadór Timor-Leste iha Japaun, Ilídio Ximenes da Costa hasai foto hamutuk ho Honoráriu Konsúl Jerál Timor-Leste ba Japaun, Kitahara Iwao. Imajen/Espesiál

DILI, 12 maiu 2022 (TATOLI)–Embaixadór Timor-Leste iha Japaun, Ilídio Ximenes da Costa, iha semana ne’e ofisialmente entregra karta nomesaun hosi Ministra Negósiu Estranjeiru no Kooperasaun Timor-Leste, Adaljiza Albertina Xavier Reis Magno, ba eis Embaixadór Japaun ba Timor-Leste, Kitahara Iwao nu’udar Honoráriu Konsul Jerál Timor-Leste ba Japaun.

Biban ne’e, Embaixadór Ilídio Ximenes da Costa, hato’o agredesementu ba reprezentante hosi Ministériu Negósiu Estranjeiru Japaun, KANO Takehiro, no Diretór Jerál ba asuntu Southwest Asian Affairs no MASUDA Ayako.

“Nomeasaun ba Honoráriu Konsul Jerál Timor-Leste ba Japaun hanesan misaun ida ne’ebé importante bainhira nia misaun hanesan Embaixadór Timor-Leste ba Japaun,” Embaixadór hateten liuhosi nota ne’ebé Agência Tatoli asesu, kinta ne’e.

Notísia relevante: Embaixada Japaun iha Dili oferese resepsaun Tokyo Olympics Games

Kitahara Iwao hanesan pesoál ne’ebé iha relasaun forte ho líder Timor-Leste nian no hanesan mós pesoál importante ne’ebé iha sosiedade sivil iha Japaun, ne’ebé bele tulun no ajuda halo koneksaun ba setór privadu sira no organizasaun sira seluk, atu nune’e bele tulun dezenvolve ekonomia no Indústria iha Timor-Leste, liuliu iha área peska, agrikultura, turizmu, no área sira seluk.

Iha loron 10 novembru 2020, Embaixada Timor-Leste iha Tókiu rekomenda ba Governu Timor-Leste liuhosi MNEK atubele konsidera no nomea Kitahara Iwao hanesan Honoráriu Konsul Jerál Timor-Leste ba Japaun no ikus mai aprova hosi MNEK iha loron 10 marsu 2022 no aseita hosi MOFA Japaun iha loron 06 abril 2022.

Partisipa iha eventu ne’e reprezentante hosi Governu Japaun mak KANO Takehiro, Diretór Jerál ba asuntu Southwest Asian Affairs.

Diretór Jerál ba asuntu Southwest Asian Affairs no MASUDA Ayako hato’o agradese ba Embaixadór Ilídio Ximenes da Costa no Governu Timor-Leste ne’ebé nomea ona Kitahara Iwao hanesan Honoráriu Konsúl Jerál Tmor-Leste ba Japaun, ne’ebé iha kapasidade no esperiénsia barak ne’ebé bele tulun Timor-Leste.

Honoráriu Konsúl Jerál Timor-Leste ba Japaun, Kitahara Iwao, agradese ba Embaixadór no Governu Timor-Leste ne’ebé fó fiar no nomea ona nia hanesan Honoráriu Konsul Jerál Timor-Leste ba Japaun.

“Sei servisu hamutuk ho Embaixada no entidade sira seluk atu tulun Timor-Leste ba oin,” Kitahara Iwao kompromete.

Kitahara Iwao sei estabelese eskritóriu ofisiál iha loron 20 maiu 2022 no hahú funsaun nu’udar Honoráriu Konsul Jerál Timor-Leste ba Japaun durante tinan-tolu.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here