EDTL, EP halo peskiza ba fatin konstrusaun parke Solár Panél. Imajen Tatoli/Argentina Cardoso

MANATUTU, 12 maiu 2022 (TATOLI)- Eletrisidade Timor-Leste, Ep (EDTL, Ep) hamutuk ho konsultór internasionál – Enturas, kinta ohin, halo peskiza ba fatin parke Solár Panél hodi halo estudu detallu kona-ba sítiu ba futuru konstrusaun Solár Panél.

Prezidente EDTL, Ep, Paulo da Silva ba jornalista sira informa katak, EDTL, Ep iha planu no alvu atu harii 100 Megawat (Mw) – kapasidade enerjia.

Prezidente EDTL, Ep, Paulo da Silva. Imajen Tatoli/Argentina Cardoso

“Planu no target atu harii 100 Megawatt, maibé sei depende ba rezultadu estudu ne’ebé halo daudaun halo bele akomoda ba 100 Megawat ga lae’’.

Lider másimu empreza eletrisidade ne’e akresenta, planu atu konstrui parke Solár Panél ne’e mak atu redús kustu ba produsaun enerjia ne’ebé boot kada tinan, liuliu ba kustu kombustível.

“Ita-nia kapasidade sentrál sira ne’e boot, maibé ita-nia kustu ba produsaun enerjia ne’e bo’ot liu.  Ba kada tinan ne’e mak gastu teb-tebes. Kada tinan ita hasai 100 itál miloens dolár no ho produsaun enerjia Solár Panél bele hamenus kustu husi 40 %”.

Enkuantu, kapasidade husi solár panél ne’e sei injeta ba liña eletrisidade, signifika enerjia ne’ebé prodús iha parke Solár Panél ne’e sei uza ba teritórriu Timór laran.

Estudu hanesan mós sei halo iha munisípiu Baucau, Liquiça ba konstrusaun parke Solár Panél, hafoin ekipa sei halo estudu hodi deside fatin iha munísipiu ne’ebé mak priense kritéria atu konstrui parke Solár Panél.

Entretantu, estudu ne’ebé daudaun ne’e halo hela husi konsultór internasionál husi Austrália-Ensura, akompaña mós husi vise-prezidente EDTL Ep, konsultór nasionál no internasionál no mós tékniku EDTL, Ep.

Notísia relevante:Projetu eletrifikasaun pakote 34, hitu iha faze implementasaun

Jornalista: Argentina Cardoso

Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here