Administradór postu administrativu Atabae, Lino Tavares. Imajen Tatoli/Sérgio da Cruz.

BOBONARO, 12 maiu 2022 (TATOLI) – Administrasaun postu administrativu Atabae, munisípiu Bobonaro, sei komemora loron restaurasaun independénsia 20 maiu ba dala XX ho atividade tolu.

Administradór postu administrativu Atabae, Lino Tavares, esplika atividade haat ne’e mak hanesan, kompetisaun dada-tali entre grupu sira hosi suku-suku, kurrida maratona  feto ho mane. Enkuantu atividade ne’e sei realiza hafoin serimónia hasa’e bandeira nasionál, maibe hafoin ida ne’e sei realiza mós programa ‘Kalan Haksolok’ ho animasaun múzika no dahur.

“Ami-nia planu ne’e fiksu ona, maibe sei ita haree took orsamentu ne’ebé minusípiu aloka mai, iha posiblidade atu realiza ka lae, maibe ha’u hanoin katak ho orsamentu mai ne’e natoon de’it mós  ami bele realiza, tanba atvidade sira-ne’e tinan-tinan ami sempre realiza hanesan atu harame ita-nia festa ne’e,” nia informa ba Tatoli, iha Maliana, kinta ne’e.

Maski nune’e autoridade postu ne’e apela ba komunidade sira atu partisipa másimu iha eventu importante ne’e, tanba tinan ne’e iha mós serimónia imvestidura ba Prezidente Repúblika eleitu iha Tasi-tolu, Dili.

“Ita nu’udar sidadaun ida-ne’ebé di’ak iha sentidu nasionlizmu no patriotizmu ba rai ida-ne’e, tenke ho vontade tomak mai partisipa hotu atu ita bele hamutuk fó valór ba eroi sira-ne’ebé luta ba rai ida-ne’e to’o ohin ita bele goza ho situasaun hakamatek,” nia apela.

Komemorasaun 20 maiu tinan ne’e autoridade munsípiu Bobonaro prvee $17,640.50. Hosi montante ne’e aloka ba postu administrativu Atabae atu realiza eventu importante ne’e hamutuk rihun $1 no kada suku sei hetan valór $75.

Enkuantu postu administrativu Atabae iha aldeia 20, suku haat kompostu hosi suku Aidabaleten, Hataz, Atabae no Rairobo ho área luan 273,1 km2 no totál populasaun 13,268 kompostu hosi feto 6,586, mane 6.682 ho totál xefe família 2,804.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here