Prezidente Vietname, Nguyen Xuan Phuc, hala’o abertura SEA Games 2021 Vietneme. Imajen/Hortencio Sanchez.

VIETNAME, 12 maiu 2022 (TATOLI)– Prezidente Vietname, Nguyen Xuan Phuc, kinta ne’e, ofisialmente halo abertura ba jogu SEA Games 2021 no agradese ba disponibilidade atleta hosi nasaun 11 iha Sudeste Aziátiku ne’ebé partisipa eventu ne’e.

Abertura ne’e halao iha Estádiu Nasionál My Dinh, Hanoi, iha tuku 20:30 oras Vietname, kalan nune’e atividade hot-hotu sei hala’o durante semana rua, hahú loron 12 too 24 maiu tinan ne’e.

“Lori naran partidu no Governu Vietname agradese ba partisipasaun hotu iha SEA Games ba dala-31, iha kapital Hanoi Vietname. Iha momentu ida ne’e ha’u hakarak deklara abertura ba jogu Sudeste Aziátiku ida ne’e bele la’o ho susesu,” Prezidente Vietname ne’e hateten liuhosi diskursu bainhira halo abertura ba SEA Games.

Durante multi eventu ne’e, sei iha kompetisaun hosi hamutuk 526 no hosi área desportu hamutuk 40, ne’ebé antes ne’e Komisaun Organizadora hosi Komité Olímpiku Vietname halo ona evaluasaun no bazeia mós hosi regra Southeast Asian Games Federation (SEAGF).

SEA Games ba dala-31 ne’e, ba dahuluk aprezenta jogu Xiangqi ka xadres hosi Xina.

Eventu ne’e partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura.

Aprezenta modalidade hitu, patrimóniu kulturál no relijiozu

Embaixadaora Timor-Leste iha Vietname, Maria Olandina Isabel Caeiro Alves hateten, Komisaun Organizadora (KO) Sea Games Vietname husu embaixada atu aprezenta Timor-Leste nia ikóniku ka patrimóniu kulturál no relijiozu iha ezibisaun Sea Games ba dala-31.

“Ezibisaun ne’ebé ita vizita ona kada rai hotu hatudu sira-nia tradisaun ho kultura, nune’e sira mós husu ba ita, Timor-Leste, oferese ita-nia ikóniku hanesan imajen Kristu Rei iha Fatucama no sasán tradisionál ruma hodi aprezenta iha sira-nia ezibisaun. Entaun, ita hosi embaixada fó tais-mane no tais-feto, belak, mortel atu sira tau iha espozisaun,” Embaixadora Timor-Leste iha Viatname ne’e hateten ba Agência TATOLI, sábadu ne’e.

Alende ne’e, Timor-Leste mós aprezenta ho modalidade hamutuk hitu hanesan, Taekwondo, Karate-do, Boxe, Natasaun, Futeból, Atletizmu no Ankat Besi hodi kompete iha eventu ne’e.

Reprezentante Atleta hosi modalidade Atletizmu, Felisberto de Deus, ne’ebé partisipa iha abertura ne’e, hateten sente orgullu tanba bele hamutuk ho nia kolega sira partisipa iha eventu  internasionál ne’e.

“Ha’u sente kontente no orgullu bele reprezenta ita nia nasaun mai partisipa iha eventu ne’e, nu’udar Timoroan ha’u sei esforsu an makas atu halo kurida ida ne’ebé makas atu fó netik medalla ruma ba Timor-Leste,” Atleta kompromete.

Iha eventu ne’e partisipa hosi nasaun ASEAN hamutuk 11 mak hanesan Brunei Daru Salam, Singapura, Thailandia, Vietname, Timor – Leste, Laos, Kamboja, Myanmar, Indonezia, Malazia no Filipina.

Iha abertura ne’e, partisipa mós hosi líder nasionál kada nasaun iha ASEAN no diplomata hosi nasaun oioin ne’ebé hala’o knaar iha Vietname no Timor-Leste partisipa direita hosi Embaixadora, Maria Olandina Isabel Caeiro Alves ne’ebé hala’o misaun diplomata iha Vietname.

Istória konba-ba Sea Games

Hanesan eventu desportivu prestíjiu iha Sudueste Aziátiku, Jakarta-Sebagai ajang olahraga bergengsi di Asia Tenggara, SEA Games iha ninia istória ne’ebé naruk.

SEA Games nu’udár akrónimu hosi Southeast Asian Games ne’ebé bele interpreta hanesan festa desportivu ka jogu ba Sudueste Aziátiku. SEA Games tinan 2021 agora ne’e, tanba COVID-19, realiza fali iha fulan-maiu 2022 iha Vietname no modalidade futeból hahú hala’o ona kompetisaun.

SEA Games hahú ho naran SEAP Games

Ba dahuluk, festa desportiva ne’e hanaran SEAP Games (Southeast Asian Peninsular Games). Iha loron 22 maiu 1958, iha biban ne’ebá, delegasaun hosi nasaun sira Southeast Asian Peninsula tuie Asian Games iha Tokyo, Japaun.

Sira halo sorumutu no konkorda atu harii organizasaun desportiva ida. Hafoin foti desizaun, SEAP ka SEA Games konseptualiza hosi Vise-Prezidente Komité Olimpiade Thailándia, Laung Sukhurmnaipradit, hanesan Komité Olimpiade Thailándia.

 Nasaun Fundadór

SEA Games ne’e funda hosi nasaun sira hanesan Thailándi, Myanmar, Malázia, Laos, Vietname no Kambodia. SEAP Games ka SEA Games ne’e harii atu hametin relasaun liu-liu servisu hamutuk entre nasaun sira iha rejiaun ASEAN.

Realiza dahuluk

SEAP Games ba dahuluk realiza iba Bankoke iha 12 too 17 dezembru 1958. Eventu ne’e partisipa maizumenus atleta 527 no komisaun oreganizadora hosi Thailándia, Myanmar, Singapua, Vietname no Laos ne’ebé tuir kompetisaun iha modalidade desportiva 12.

Membru foun

Iha SEAP Games VIII tina 1975, Federasaun SEAP tetu hodi simu membru nasaun foun Indonézia no Filipina. Nasaun rua ne’e formalmente tama iha 1977, no iha tinan hanesan Federasaun SEAP troka naran sai Southeast Asian Games Federation (SEAGF), no eventu ne’e sai festa desportiva ba nasaun sira iha Sudueste Aziátiku.

Brunei Darrusalam hahú partisipa no tama iha festa desportiva nasaun Sudueste Aziátiku ba dala-X iha Jakarta, Indonézia, no Timor-Leste hahú partisipa festa desportiva Sudueste Aziátiku bad ala-XXII iha Hanoi, Vietname.

Jornalista : Hortencio Sanchez

Editór       :  Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here