Ekipa téknika sira reabilita hela infraestrutura eskolár iha Eskola EBC, iha Bidau Akadiru-hun, kuarta (11/05). Imajen Tatoli/Tomé Amado

DILI, 11 maiu 2022 (TATOLI)–Prosesu reabilitasaun edifísiu rua no sala aula hitu iha Eskola Ensinu Báziku Sentrál (EBC, sigla portugés) iha Bidau Akadiru-hun hahú daudaun ona.

“Ami garante prosesu reabilitasaun ne’e atinje ona 25%, tanba ami haree hosi prosesu tomak, sala neen taka hotu ona kalen, sala haat mak foru no monta ona janela no odamatan inklui sala rua ami haree sei iha prosesu nia laran,” Xefe Gabinete Apoiu Tékniku (GAT) iha Eskola EBC Bidau Akadiru-hun, Celestino Francisco Asis, informa ba Agência Tatoli iha Eskola EBC Bidau, kuarta ne’e.

Tuir Xefe GAT, orsamentu ne’ebé sira simu ba faze dahuluk tenke atinje 25%, tanba ne’e daudaun konklui ona no hein de’it parte eskola submete filafali relatóriu atu kontinua tan reabilitasaun sala sira tuir mai iha faze tuir mai.

“Iha faze daruak ne’e ami sei hadi’a tan sala rua, sekretariadu ida inklui hariis fatin ida tan, maibé ami rona katak molok atu kontinua hadi’a ka sobu fasilidade sira ne’e, parte Ajénsia Dezenvolvimentu Nasionál (ADN) tenke haree uluk,” nia akresenta.

Notísia relevante: Konstrusaun no reabilitasaun eskola 197 sei realiza iha janeiru 2022

Aleinde ne’e, eskola ne’e ninia edifísiu harii iha tempu japonez ne’ebé la uza besi.

“Realidade sala aula hitu mak sobu ona, tanba edifísiu leten laiha besi. Tanba ne’e, ADN husu ba parte eskola molok atu sobu tenke informa ba sira atu bele observa direita hodi haree kondisaun sala sira,” nia tenik.

Prosesu reabilitasaun ne’e tuir planu sei finaliza iha fulan-neen nia laran, ne’ebé iha jullu tinan ne’e tenke konklui ona. 

Enkuantu, totál eskola iha territóriu nasionál ne’ebé tama iha prosesu konstrusaun no reabilitasaun hamutuk 204 no iha kapitál Dili rasik iha eskola hamutuk 16 inklui sala aula 64.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here