Konfrontu ne’e akontese iha areadór UNPAZ. Imajen/Espesial

DILI, maiu 2022 (TATOLI)- Komandante Polísia Eskuadra Dom-Aleixo, Munisípiu Dili, Inspetór Asistente Américo Fatíma, informa membru PNTL konsege detein ema na’in-rua ne’ebé deskonfia autór ba konfrontu iha areadór Universiade da Paz (UNPAZ).

Konfrontu ne’e akontese iha areadór UNPAZ, maizumenus tuku 13:00, meudia, tanba deskonfia membru Grupu Arte Marisál (GAM) hosi Ikatan Kera Sakti (IKS) no Grupu Persaudaraan Setia Hati Terrate (PSHT) mak ataka malu  hodi rezultadu balun kanek.

“Kazu konfrontu ne’e ninian motivu maka entre Grupu Arte Marsiál hosi Ikatan Kera Sakti (IKS) no Persaudaraan Setia Hati Terrate (PSHT), hahú sira tawar malu atu tuku malu iha área kampus UNPAZ no konsege mosu duni konfrontu entre grupu rua ne’e,” Komandante Eskuadra Dom-Aleixo informa ba Agência TATOLI, via telefônika.

Hafoin konfrontu iha meudia, Komandante ne’e dehan ekipa PNTL Eskuadra Dom-Aleixo halo kedan intervensaun ba iha situsaun no halo identifikasaun no deteinsaun ba autór kontrontu refere.

“Ita konsege halo indentifikasaun ba vitima sira no suspeitu sira no liu hosi identifiksaun ne’e ita konsege suspeita hela autór nain-rua. Daudaun ita detein ona sira nain-rua iha sela detensaun Komandu PNTL Eskuadra Dom-Aleixo nian durante oras 72. Vitima sira iha konfrontu ne’e iha ema nain tolu, ida maka kanek grave no suku pontu neen iha ulun, nain rua seluk kanek grave,” nia akresenta.

Nune’e, Eskuadra Dom-Aleixo sei kontinua buka tuir suspeitu sira hosi konfrontu ne’e hodi submete ba investigasaun.   

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

1 KOMENTÁRIU

  1. Husu to’ok ba Governu, liu-liu Sekretáriu Estadu Juventude no Desportu tanba foin daudaun nia dehan katak hafoin legaliza, frekuénsia konfrontu entre GAM tuun, mas iha realidade, tuir ha’u-nia hanoin, nafatin de’it. Uluk dehan katak bainhira hafoin legaliza maka sei akontese nafatin problema entre GAM maka sei bolu ninia lider sira atu responsabiliza, idane’e akontese ka lae? Aat liután maka Governu ida-ne’e aprova osan atu harii GAM sira-nia sede.

HAKEREK NO HATÁN

Please enter your comment!
Please enter your name here