Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 11 maiu 2022 (TATOLI) – Polísia Nasionál Timor-Leste (PNTL) hosi komandu munisípiu Bobonaro nafatin preparadu atu asegura eventu komemorasaun loron restaurasaun independénsia 20 maiu ba dala-XX ne’ebé  nível munisipál sei realiza iha kampu futeból Maliana.

Komandante PNTL Munisípiu Bobonaro, Superintendente Antoninho Mauluta, informa, daudaun ne’e prepara ona planu operasaun atu hatún orden ba komandante eskuadra postu administrativu neen atu garante seguransa ba komunidade sira.

“Ha’u mós orienta ona komandante eskuadra sira atu halo liña kordenasaun ho ita-nia administradór postu no xefe suku sira oinsá atu apoiu no kontribui ba seguransa, iha komemorasaun ne’e hotu-hotu mai partisipa lori asiste no akompaña serimonia ne’e la’o to’o rohan ho di’ak,” nia informa ba jornalista sira iha Maliana, kinta ne’e.

Superintendente ne’e reforsa, ba oin membru PNTL sei koordena ho Batallaun Orden Públika (BOP), Komando Operasaun Espesiál (COE, sigla portugés) no FALINTIL-Forsa Defeza Timor-leste (F-FDTL) halo patrulamentu beibeik iha fatin hotu-hotu atu kontrola individu ka grupu balun ne’ebé tenta perturba orden públika.

“Ha’u husu ba komunidade tomak no alin joven sira, bainhira mai partisipa hodi akompaña serimónia ne’e la’o karik, labele mai hemu-lanu no kaer kro’at iha liman,” nia apela.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here