Deputadu sira vota Orsamentu Retifikativu tinan 2022 ho montante biliaun $1,5 iha faze finál globál, iha sala plenária Parlamentu Nasionál, kuarta (11/05). Imajen Tatoli/António Daciparu

DILI, 11 maiu 2022 (TATOLI)–Primeiru-Ministru (PM), Taur Matan Ruak, kompromete katak sei halo esforsu hotu hodi ezekuta Orsamentu Retifikativu tinan 2022 ho montante biliaun $1,5 resin ho di’ak, hodi finansia medida sira.

“La’ós normál iha demokrasia, sira ne’ebé lakon kumpre promesa, normalmente iha demokrasia sé mak kumpre promesa mak sira ne’ebé manán iha eleisaun sira. Ami halo esforsu hodi implementa ho di’ak orsamentu ne’ebé aprova, orsamentu ne’e orsamentu ida atu serví povu no benefisia sidadaun sira,” PM Taur hateten hafoin debate no aprovasaun finál globál Orsamentu Retifikativu tinan 2022 iha sala plenária Parlamentu Nasionál, kuarta ne’e.

Notísia relevante: PN aprova proposta Orsamentu Retifikativu biliaun $1,5 iha finál globál

Nune’e, Xefe Governu parabeniza no agradese reprezentante povu sira tanba bele aprova ona Orsamentu Retifikativu.

“Orsamentu ne’e ita orienta liu ba  populasaun sira, ho hanoin ida katak ema mak sai sentru ita-nia atensaun. Maibé liuliu iha fundu  veteranu, primeiru halakon eskluzaun no hahú era foun ida inkluzaun. Ha’u hanoin sira ne’ebé kontribui fulan-neen no hitu  mós halo kontribuisaun, ita laiha razaun atu esklui sira hosi prosesu ida-ne’e, objetivu segundu maka ho kriasaun fundu ida-ne’e torna buat ne’ebé la sustentável ba sustentável tanba ita foti nia juru de’it, ita la fahe osan,” Xefe Ezekutivu esplika.

Notísia relevante: Fundu veteranu gasta hosi retornu investimentu

Aleinde ne’e, kona-ba fundu empréstimu suave, Governu foin dahuluk  tau atensaun no forma integrada ba setór produtivu hodi fasilita kréditu hodi dada atensaun setór privadu ba setór produtivu.

“Ne’e pasu importante loos no estratéjiku, tanba bele fó kbiit ba ita atu iha konfiansa iha ita-nia an no aproveita másimu rekursu sira ne’ebé iha hodi sustenta nasaun no bele valoriza produtu lokál, ne’e la hateten katak ita tenke despreza produtu seluk, maibé bainhira ita la valoriza sé mak valoriza fali,” nia tenik.

Enkuantu, Proposta Orsamentu Retifikativu antes ne’e Governu aprezenta ho montante $1.413.900.930, maibé durante diskusaun espesialidade deputadu sira aprezenta tan proposta adisionál kuaze millaun $100 resin, nune’e sai $1.525.254.428.

Hosi montante ne’e aloka ba kategoria saláriu no vensimentu $5.600.000, bens no servisu $64.324.720, transferénsia públika $1.454.993.108, kapitál menór no kapitál dezenvolvimentu laiha.

Ho aprovasaun ne’e, sei lori dokumentu ba Komisaun C ne’ebé trata asuntu Finansa Públika sei halo redasaun finál ho nia alterasaun iha Proposta Lei Orsamentu Jerál Estadu (OJE) 2022, hafoin sei enkamiña ba Prezidente Repúblika hodi bele promulga ka veta tuir kompeténsia.

Proposta Orsamentu Retifikativu ho montante biliaun $1,129 ne’ebé prevee ba transferénsia públika $1.837.634.189, bens no servisu $466.877.382, kapitál dezenvolvimentu $390.177.399, saláriu no vensimentu $250.537.130 no kapitál menór $41.914.097.

Orsamentu Retifikativu ne’e mai ho medida 13 hanesan Atribuisaun osan fulan da-13 ba kada família (exeptu funsionáriu públiku sira), Projetu Uma Kbiit Laek Plus, Bolsu Estudu ba Mellór Graduado Estudante, Kriasaun Fundu Veteranu, Programa Maundobra ba Postu Administrativu (PEMOPA), Harii Sede ba Arte Marsiál no Rituál, Programa Eskola iha uma (home school).

Nune’e mós, Oferese internet gratuitu ba eskola sira hahú hosi Eskola Infantil to’o Ensinu Superior, Buka Empregu ba mellór alunu universitáriu sira, Estabelesimentu Sekretária ba Asuntu Traballadór Esteriór no Komunidade Timoroan iha Diáspora, Revitaliza kafé no subsídiu ba kafé Laku-teen, Subsídiu akomodasaun ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) no ikus liu Pagamentu renumerasaun PNTL nian ho rejime salariál foun.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here