Prezidente Autoridade RAEOA, Arsénio Paixão Bano. Imajen Tatoli/Francisco Sony.

OÉ-CUSSE, 11 maiu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno, (RAEOA) no Zona Espesiál Ekonómia Sosiál Merkadu Timor-Leste (ZEESM TL), Arsénio Paixão Bano, apela ba komunidade iha rejiaun ne’e atu hasa’e bendera iha uma oin hodi dignifika no valoriza eroi sira-ne’ebé sakrifika sira-nia an ba rai ida-ne’e.

“Relasiona ho komemorasaun loron restaurasaun independénsia Timor-Leste ba dala-XX nian, ita espera no husu konsiénsia komunidade hotu iha territóriu RAEOA atu hari’i bandeira Repúblika Demokrátika Timor Leste (RDTL) iha uma oin nomós transporte privada no públiku sira, dignifika no valoriza eroi sira-ne’ebé sakrifika sira-nia an, mate ba rai ida-ne’e” Arsénio Paixão Bano, hato’o apela ne’e ba jornalista sira iha rezidénsia ZEESM Oé-Cusse, kuarta ne’e.

Razaun husu apelu ne’e atu husu komunidade RAEOA harii bandeira RDTL iha uma oin ida-idak atu re-lembra hikas eroi pátria sira-nia dedikasaun no sakrifísiu tomak iha prosesu ukun rasik-an hahú husi 1975-1999.

“Loron istóriku ne’e importante ba nasaun Timor-Leste, nu’udar sidadaun iha nasaun ne’e, tenke respeita hanesan loron independénsia hosi jerasaun ba jerasaun, tanba iha tinan 20 kotuk, mundu rekoñese ona katak Timor-Leste independénsia unilaterálmente ona iha mundu nia leet,” nia katak.

Tuir nia, komemorasaun 20 maiu tinan ne’e importante, tanba iha ámbitu ne’e sei fó mós pose ba Prezidente Repúblika eleitu ba períodu 2022-2027, José Manuel Ramos Horta, ne’ebé sei realiza iha seremónia ofisiál iha Tasi-Tolu, Dili, no sei komemora mós iha nível munisípiu hotu.

Tán ne’e, autoridade RAEOA sei orienta jestór sub-rejiaun sira hamutuk haat, atu aviza tama sai suku no aldeia hotu, nune’e konsiensializasaun komunidade sira hasa’e Bandeira RDTL iha uma oin hodi selebra loron importante ne’e.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here