DILI, 11 maiu 2022 (TATOLI) –Ministériu edukasaun, juventude no desportu (MEJD) hamutuk ho Embaixada Estadu Unidu Amérika (EUA) no Fundu nasaun unida ba labarik (UNICEF) lansa ona inisitativu atu introdús treinamentu kona-ba abilidade sékulu 21 ba foin-sa’e sira iha Timor-Leste. Treinamentu ne’e sei implementa iha munisípiu Baucau, Dili, no Manatuto.

Inisiatiava ida-ne’e lansa husi Diretór jerál edukasaun no ensinu, Luis Fernandes no Adjunta reprezentante UNICEF, Ainhoa Jaureguibeitia, iha Sentru aprendizajen komunitária Cristo Rei ne’ebé atende husi estudante sira husi Sentru Aprendijazen, mestre, inan-aman no membru komunidade sira.

“Timor-Leste agora sai lider hodi explora limitasaun foun iha edukasaun ba labarik no foin-sa’e sira globalmente. Timor-Leste mak nasaun dahuluk introdús Plataforma Eskola ba Uma/Passporte Aprendizajen atu asegura labarik sira kontinua aprende durante tempu pandemia. Agora ita mós introdús kursu Abilidade Sékulu 21 atu ajuda joven sira aprende kona-ba abilidade xave sira no hadi’ak sira-nia aprendizajen hanesan ho nasaun barak sira seluk iha mundu,” Diretór jéral edukasaun no ensinu MEJD, Luis Fernándes hateten iha lansamentu treinamentu Abilidade Sékulu 21 ba foi-sa’e sira iha Sentru Aprendizajen Komunitária, iha Cristo Rei, tersa semana ne’e.

Liuhusi inisiativa ida-ne’e, MEJD sei implementa kursu sia mak hanesan siénsia, téknolojia enjeneria, arte no matematika (STEAM) no literásia finanseiru. Kursu sira ne’e sei inklui téoria no matadalan prátika sira no enkoraja foin-sa’e sira atu rezolve problema real ne’ebé mak sira hasoru iha mundu ohin loron, liu-liu ho asuntu sira liga ho mudansa klimátika, saúde, saneamentu, resiklajen, no prezervasaun hahan.

Kursu sira-ne’e disponível iha lian Tetun, no uza aproximasaun inovativu, nivel mundiál, husi Massachusetts Institute of Technology (MIT) no Universidade INSPER iha Brazil. Kursu sira ne’e dezenvolve husi MEJD, UNICEF, MIT no Universidade INSPER.“Program ne’e sei ajuda lider futuru Timoroan sira dezenvolve abilidade sira-ne’ebé mak presiza ba ekonomia sékulu 21. Programa ne’e refleta komitmentu EUA atu haforsa oportunidade edukasaun ba estudante Timoroan sira, nune’e mós ami-nia parseiria ho Timor-Leste,” Enkaregadu Embaixada EUA, Tom Daley hateten.

Iha fatin hanesan, Adjunta reprezentante UNICEF, Ainhoa Jaureguibeitia hateten: “Kursu sira-ne’e sei ajuda foin-sa’e sira iha Timor-Leste aprende abilidade sira ne’ebé mak relevante iha mundu ohin loron no ajuda sira lidera inovasaun no rezolve problema sira ne’ebé mak iha impaktu ba sira agora no ba jerasaun tuirmai. Kolaborasaun ida-ne’e entre governu EUA, MEJD no UNICEF sei ajuda foin-sa’e sira ba futuru no sira sai forsa ba mudansa pozitivu.”

Ho apoiu husi Governu Estadu Unidu Amérika, liuhusi Embaixada EUA iha Dili, UNICEF no Ministériu Edukasaun, Juventude, no Desportu sei kontinua implementa kursu sira-ne’e ba foin-sa’e sira iha Baucau no Manatuto no sei organiza eventu entre eskola sira kona-ba siénsia, téknolojia, enjeneria, arte, no mátematika.

Kursu sira-ne’e agora disponovel iha Plataforma Microsoft’s Learning Passport platform, Eskola ba Uma plataforma.

Jornalista: Filomeno Martins

 Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here