Konsellu Veteranu RAEOA, Martinho da Cunha. Imajen Tatoli/Abílio Elo Nini.

OÉ-CUSSE, 11 maiu 2022 (TATOLI) – Konsellu Veteranu iha Rejiaun Administrativa Espesiál Oé-Cusse Ambeno (RAEOA), rejista kombatente libertasaun nasionál na’in-504 seidauk aprezenta-aan iha ekipa verifikadór atu verifika dokumentu komprovativu hodi sai membru veteranu.

Sekretáriu Sub-Rejiaun Haksolok RAEOA, Martinho da Cunha, informa, tuir lista ne’ebé rejista iha 2009 ba faze daruak hamutuk 3.961, maibé na’in-3.457 verifka ona hela na’in-504 maka seidauk.

“Inskrisaun 2009 nia totál ne’e hamutuk 3.961, depois ami hahú halo verifkasaun iha 2019, maibé la hotu, ami kontinua iha 2020, ne’e maka konsege ami halo hotu mais sei hela 504 mak sei hotu,” Konsellu Veteranu RAEOA, Martinho da Cunha, hatete iha Oé-Cusse, kuarta ne’e.

Nia informa, kombatente na’in-504, sira-ne’e espalla iha 12 munisípiu, tán ne’e maka atraza prosesu verifikasaun lista kombatetente nian iha Oé-Cusse, ne’ebé tama ba kategória pendente, tanba seidauk hotu.

“Agora iha 03 maiu ami komesa loke fila-fali atu verifika sira-ne’ebé maka seidauk verifikadu, mais tanba sira iha munisípiu seluk, iha RAEOA konsidera remata tiha ona, maibé ami hatama proposta tán iha Komisaun Omenajen, atu finaliza hotu lista pendente sira-ne’e, tanba balu hela ketak-ketak iha munisípiu hotu,” nia katak.

Tuir nia, kritériu ne’e presiza mai konsentra iha idak-idak nia moris fatin, sira-ne’ebé verifika ona hamutuk 3.457 dadus submete ona iha Komisaun Omenajen atu hein de’it nia aprovasaun, ba lista pendenti ne’e Komisaun Omenajen fó tempu to’o novembru 2022 tenke taka.

“Tanba lista pendente inklui balu mate ona, entaun presiza nia família atu reprezenta submete dokumentu komprovativu, kartaun eleitotál ka billete identidade, sertidaun RDTL, no komprova hosi testemuña liuhosi diresaun ka organizasaun ne’ebé nia hala’o serbisu iha prosesu luta ukun-an nian,” nia katak.

Nia fó-sai katak, ekipa verifikadór (avaliadór) dadus benefisiáriu kombatente libertasaun nasionál iha RAEOA hamutuk 54, ne’ebé antes ne’e iha 2019 simu ona juramentu hosi Komisaun Omenajen hodi verifika dadus ne’ebé rejista iha 2009, totál 3.961 ho loloos.

Hosi númeru ne’e, iha sub-rejiaun Pante Makasar hamutuk 1.904, komposta hosi suku Costa 367, Nipani 68, Lalisuk 404, Cunha 395, Naimeco 87, Bobokase 144, Lifau 72, Taiboko 376.

Hosi sub-rejiaun Oésilo hamutuk 921 komposta hosi, suku Usitasa’e 301, Usitaqueno 164, Bobometo 456, iha sub-rejiaun Pássabe hamutuk 401 hosi suku Abani 240, Malelat 161, no iha sub-rejiaun Nítibe hamutuk 657, hosi suku Suni-Ufe 292, Lela-Ufe 83, Usitaku 203, Bene-Ufe 79.

Entretantu tuir livru 3-C, Orsamentu Jerál Estadu (OJE) 2021 RAEOA-ZEESM Timor-Leste, haktuir benefisiáriu ne’ebé hetan apoiu osan Estadu iha RAEOA ba kombatente ou veteranu libertasaun nasionál hamutuk ema na’in-363, no martir libertasaun nasionál hamutuk ema na’in-223.

Notisia relevante: Infografia: Konsellu Veteranu RAEOA verifika ona kombatente 3.457

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here