Diretór MOP Baucau, Pedro Alexander Guterres Perreira. Imajen Tatoli/Natalino Belo.

BAUCAU, 11 maiu 2022 (TATOLI) – Kompañia hitu fulan-maiu ne’e sei hahú projetu reabilitasaun Estrada Rurál ba Dezenvolvementu (ERD) iha suku Afaçá, postu administrativu Quelicai no suku Uaioli, postu administrativu Venilale, munisípiu Baucau.

Diretór Obra Públika Munisípiu Baucau, Pedro Alexandre Guterres Pereira, esplika, kompañia hitu ne’e sei implementa projetu reahbilitasaun estrada rurál hamutuk pakote hitu ho tótal distánsia kilómetru 20.6.

Estrada rurál ne’e iha postu administrativu Quelicai ho pakote haat, hahú hosi suku Afaçá ba Gurusa no Uaitame hamutuk kilómetru 12.

Nune’e mós postu administrativu Venilale vila ba suku Uaioli hamutuk pakote tolu ho kilómetru 8.6, nune’e totál kilómetru 20.5 ho tótal orsamentu millaun $2,5.

“Baucau ita hetan orsamentu hosi Fundu Infraestrutura ne’ebé mak tuir loloos orsamentu ne’e tinan-2021 nian maibé prosesu aprovizonamentu tarde entaun projetu asina kontratu iha fali tinan-2022,” Diretór Obra Públika Munisípiu Baucau hateten iha Vila Nova, kuarta ne’e.

Tuir planu semana oin kompañia hitu ne’e hahú ona reabilitasaun estrada rurál ba dezenvolvementu (ERD) pakote hitu iha postu Quelicai no Venilale ne’ebé tuir durasaun kontratu durante tinan-ida.

Postu Quelicai hosi suku Afaçá-Gurusa-Uaitame sei reabilita hosi kompañia Flores Unipessoa.lda, kompañia Helsia Unipesoal.lda, Dilidi unipessoal.Lda no Lialura Unipesáol.lda ho distánsia kilómetru 0 to’o kilómetru 12 hosi totál pakote haat.

Postu Venilale hamutuk pakote tolu diresaun Venilale ba Uaioli ho kilómetru 8.6 fahe ba pakote tolu ne’ebé responsabiliza hosi kompañia Putra Baucau Unipessoal.lda, kompañia Macalaco Unipessoal.lda no kompañia Morenda Unipessoal.lda

“Husu atu ita tau matan ba, koopera ho kompañia nune’e projetu ne’e bele susesu tanba orsamentu hosi kofre estadu, husu atu halo ho kualidade nune’e povu bele utiliza,” Pedro akresenta.

Xefe suku Afaçá, Joaquim Fernandes hateten, sente kontente tanba tinan-ne’e governu konsege reabilita estrada rurál iha Afaçá tanba durante ne’e kondisaun estrada iha área ne’ebá kondisaun estragu.

“Ami sente kontente tanba estrada iha Afaçá liga ba Darinafa no kontinua ba Guruça no Uaitame kondisaun estrada grave tebes tanba povu atu transporta produtu lokál ba merkadu araska, tanba ne’e ami agradese ba governu,” Joaquim hateten.

Tuir dadus totál estrada rurál iha munisípiu Baucau hamutuk kilómetru 474 ne’ebé reabilita ona kilómetru 169 no sei hela kilómetru 305 mak seidauk reabilita.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here