Xefi suku Ostico, Policarpo da Silva. Imajen Tatoli/Natalino Belo.

BAUCAU, 11 maiu 2022 (TATOLI) – Uma-kain 10 hosi suku Ostico, postu administrativu Vemasse, munisípiu Baucau sai benefisiáriu hodi hetan apoia subsídiu konstrusaun Uma Kbiit Laek (UKL) tiha inan ne’e.

Xefe Ostico, Policarpo da Silva hateten, prosesu verifikasaun liuhosi ekipa verifikadór kompostu autoridade suku, xefe aldeia alvu, Ofisiál Polísia Suku (OPS) no veteranu deside benefisiáriu na’in-10 hosi aldeia rua hanesan Bahamori no Haunau mak prienxe kritéria atu hetan subsídiu UKL ba tinan 2022.

“Tinan-ne’e ita hetan uma sanulu, ita verifika, tetu no haree aspeitu barak hanesan kondisaun moris, rendimentu, totál membru família mak foin deside,” Xefi Suku Ostico hateten iha sede suku Ostico, kuarta ne’e.

Ekipa tékniku hosi Programa Nasionál Dezenvolvementu Suku (PNDS) finaliza ona kontajen no suku medida rai iha fatin konstrusaun no tempu badak sei hahú prosesu koutasaun ba kompañia fornesedór materiál bainhira orsamentu iha ona konta bankária suku nian.

Hosi benefisiáriu nain-sanulu refere kompostu inan-faluk uma-kain haat no neen seluk família kbiit la’ek sei direitu ba UKL ho medida 48 metru kuadradu ne’ebé kada uma sei aloka orsamentu rihun $17 nune’e tótal orsamentu UKL ba suku Ostico hamutuk rihun $170-resin.

“Tempu besik konstrusaun fíziku ita bele hahú ona,” Policarpo da Silva akresenta.

Suku Ostico kompostu aldea tolu hanesan Ostico, Hau-Nau no Bahamori ho totál populasaun hamutuk 1.997

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here