Konservasaun Internasionál Timor-Leste (CITL) hamutuk ho Ministériu Agrikultura no Peska (MAP) halo konsultasaun área Basia Hidrografia ho autoridade munisípiu Bobonaro. Imajen Tatoli/Sérgio da Cruz.

BOBONARO, 11 maiu 2022 (TATOLI) – Konservasaun Internasionál Timor-Leste (CITL) hamutuk ho Ministériu Agrikultura no Peska (MAP) liuhosi Diresaun Jerál Floresta, kuarta ne’e konsulta área basia Hidrografia ho autoridade munisípiu Bobonaro.

Country Diretór CITL, Manuel Mendes, esplika atividade ne’e hanesan faze konsultasaun ikus nia objetivu atu rona ideia no sujestaun hosi parte relevante sira iha munisípiu Bobonaro nian nune’e ba oin bele apoia no kolabora ho CITL hodi hadi’a jestaun ba iha área Basia Hidografia trans fronteira entre Indonézia ho Timor-Leste.

“Ami mai koona-ba ko’alia liu área Basia Hidrografia Talau, Loes no futuru iha área Basia Hidrografia Mota-Masin nian, tanba ne’e maka ita presiza halo konsultasaun ho autoridade Bobonaro no parseiru dezenvolvimentu sira atu aprezenta programa ba área basia sira iha Bobonaro,” nia informa ba jornalista sira, iha salaun administrasaun munisípiu Bobonaro, kuarta ne’e.

Nia esplika, papél autoridade munisípiu to’o nível suku importante tebes atubele halo jestaun ba meiu ambiente nian, liuliu iha konservasaun baze Hidografia iha munisípiu Bobonaro,tanba dadaun ne’e, mota Loes no seluk tán hahú iha ona impaktu ladi’ak hodi sobu área agrikultura sira no sobu komunidade sira-nia uma no fó ameasa ba ema nia vida.

Nia haktuir, durante ne’e parseiru dezenvolvimentu implementa projetu barak iha munisípiu Bobonaro, maibé impaktu ba rai-laran no munisípiu mak menus tebes, tanba ne’e husu autoridade munisípiu no xefe suku sira atu halo monitorizasaun no kontrolu másimu meiu ambiente.

Prezidente Autoridade Munisípiu Bobonaro, Ernesto de Oliveira Barreto, agradese ba CITL  tanba liuhosi programa ne’e bele kontribui konserva mota no ambiente iha rai-laran ne’ebé ladún di’ak.

“Ha’u ohin apela ona ba iha administradór postu no xefe suku sira tenke serbisu maka’as iha suku laran, labele tesi ai arbiru, ha’u mós sei la ko’alia de’it, tanba ne’e hahú agora, ha’u sei hasai srikulár ida ba postu neen atu kontrola komunidade sira gosta estraga ambiente, tanba programa ida-ne’e ema ajuda ita atu hadi’a ambiente, entaun ita tenke serbisu maka’as,” nia apela.

Projetu ne’e implementa ho fundu hosi Global Environment Facility (GEF) ho montante millaun $5 no orsamentu ne’e  halibur hosi konvensaun tolu ne’ebé Timor-Leste ratifika ona hanesan, mudansa klimátika, degradasaun solu no biodiversidade.

Geografikamente Autoridade Munisipál Bobonaro ho nia luan hamutuk 1,368 km² ho

populasaun  92,049 tuir sensu 2010. Autoridade Munisipál Bobonaro iha postu administrativu neen , suku 50 no aldeia 194.

Munisípiu Bobonaro lokaliza iha parte osidentál nasaun Timor-leste ne’ebé ho nia fronteira internál no externál mak hanesan; parte norte baliza ho munisípiu Liquiçá no tasi Feto/Ombai, parte súl baliza ho munisípiu Covalima no Ainaro. Parte lorosa’e baliza ho Ermera, no Parte loromonu baliza ho Timor Osientál, Atamabua, Kabupaten Belu, Nusa Tengara Timur (NTT), Indonézia.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here