Prezidente Komisaun Organizadora komemorasaun 20 maiu Munisípiu Bobonaro, João Fátima do Carmo. Imajen Tatoli/Sérgio da Cruz.

BOBONARO, 11 maiu 2022 (TATOLI) – Prezidente Komisaun Organizadora, João de Fátima do Carmo, fó-sai katak komemorasaun loron restaurasaun independénsia 20 maiu ba dala-XX iha munisípiu Bobonaro, sei realiza atividade feira produtu lokál no jogu tradisionál hodi anima komunidade.

Nia akresenta, atividade feira produtu lokál ne’e sei fó oportunidade ba komunidade hotu ne’ebé interesante atu promove no aprezenta produtu lokál sira liuhosi kreatividade idak-idak nian, no ba jogu tradisionál sei konsentra ba iha futu-manu no bola guling no seluk tán molok realiza serimónia hasa’e bandeira nasionál.

planu ba realizasaun programa sira-ne’e prioritiza hafoin diskusaun ikus iha salaun administrasaun munisípiu hamutuk ho Prezidente Autoridade munisípiu Bobonaro, Ernesto de Oliveira Barreto no entidade relevante sira-ne’ebé envolve iha komisaun organizadora ba komemorasaun loron restaurasaun independénsia iha munisípiu Bobonaro

“Atividade sira-ne’e ita sei hahú iha loron 16 maiu lokraik até loron 20 maiu lokraik ita ensera atubele anima ita-nia komunidade sira-ne’ebé mai partisipa ita-nia festa ba loron importante ne’e,” nia informa ba jornalista sira, iha kna’ar-fatin, kuarta ne’e.

Nia dehan, kritéria atu asesu ba programa no atvidade hirak-ne’e komunidade bele submete proposta ba iha komisaun organizadora liuhosi seksaun animasaun no mós parte jestaun tursimu no merkadu munisípiu Bobonaro nune’e bele hetan lisensa.

Daudaun ne’e preparasaun restaurasaun independénsia 20 maiu ne’e atinje ona 80% tanba serbisu balu fahe ona kada seksaun, enkuantu parte seksaun parada hosi Komandu PNTL munisípiu Bobonaro, BOP no F-FDTL hahú treina estudante sira.

“Atu ita-nia atividade ne’e furak liután hanesan autoridade, ha’u enkoraja no konvida komunidade iha postu administrativu Maliana atu partisipa másimu iha ita-nia festa ne’e to’o remata tanba sei iha atividade oinoin,” nia apela.

Entretantu, orsamentu ne’ebé autoridade munisípiu Bobonaro prevee ba realiza atividade komemorasaun eventu importante ne’e iha nível munisípiu no postu administrativu sira totál $17,640,50. Hosi montante ne’e aloka ba seksaun 11, postu administrativu sira hetan rihun $1 no kada suku sei hetan $75.

Munisípiu Bobonaro iha aldeia 192, suku 50 no postu administrativu neen mak hanesan, Atabae, Balibo, Cailaco, Maliana, Bobonaro no Lolotoe ho totál populasaun 114,537 kompostu hosi feto 57,075, mane 57,462 no totál uma-kain 24,59.

Jornalista: Sérgio da Cruz

Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here