Reitór UNPAZ, Adolmando Soares Amaral. Imajen Tatoli/Egas Cristóvão

DILI, 10 maiu 2022 (TATOLI)–Universidade da Paz (UNPAZ) tinan ne’e simu tan estudante benefisiáriu programa bolsa hakbiit hamutuk 50 hosi Fundu Dezenvolvimentu Kapitál Umanu (FDCH, sigla portugés), ho nune’e totál estudante bolsa hakbiit ne’ebé integra ona ba universidade ne’e hahú tinan 2021 to’o 2022 hamutuk na’in-90.

“Tinan kotuk ita simu ona estudante bolsa hakbiit hamutuk na’in-40, ne’ebé ita koloka ona sira iha fakuldade enjeñaria no agrikultura. Tinan ne’e ita simu tan maibé númeru parese bele sa’e ba 50,” Reitór UNPAZ, Adolmando Amaral, informa ba Agência Tatoli, iha ninia knaar fatin, tersa ne’e.

Notísia relevante: Estudante Bolsa Hakbiit 95 integra ona iha UNITAL

Tuir nia, estudante ne’ebé integra iha universidade ne’e iha tinan kotuk haruka mai koloka ona iha fakuldade rua, fahe ba fakuldade iha enjeñaria na’in-20 no agrikultura na’in-20.

Tinan ne’e UNPAZ sei kontinua simu tan estudante maibé seidauk hatene dadus detallu. Tanba informasaun ne’ebé universidade simu ona iha estudante hamutuk na’in-50.

“Agora dadus detallu seidauk hatene tanba sei hein hela bainhira kuandu sira asina ona kontratu maka foin hatene, maibé sira-nia esbosu prepara hotu ona. Ita atu hatene dadus detallu estudante hirak mak sei mai bainhira sira asina ona kontratu inklui universidade mós asina ona maka ita foin hatene ninia kuantidade loloos,” nia tenik.

Estudante bolsa hakbiit iha segunda faze sei kontinua foti fakuldade hanesan nafatin tanba regra ne’ebé Ministériu Ensinu Superiór Siénsia no Kultura (MESSK) no FDCH fó tenke koloka estudante sira iha fakuldade ne’ebé hetan ona akreditasaun B.

Jornalista  : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here