Estudante Universiade Honai, Vietname foto hamutuk ho Embaixadora TL no Embaixador nasaun membru CPLP sira hanesan Angola, Portugál, Brázil Mozambique no Guine-Bisau,iha seremonia komemorasaun loron mundiál língua Portuguesa. Imajen/ Hortencio Sanchez

VIETNAME, 10 maiu 2022 (TATOLI)— Nasaun Membru Komunidade lian Portugés (CPLP) ne’ebé hala’o misaun iha nasaun Vietname hamutuk ho Universidade Hanoi iha kapitál Vietname, tersa ne’e, komemora loron internasionál língua Portuguesa.

“Universidade Hanoi iha Departementu ida Língua Portuguesa,nune’e  ohin hamutuk komemora loron mundial ne’e ne’ebé monu iha  loron 05 maiu ne’e,” Embaixadora Timor-Leste iha Vietname, Maria Olandina Isabel Caeiro Alves, hateten ba Agência TATOLI hafoin partisipa serimonia ne’ebé hala’o iha resintu Universidade Hanoi, tersa ne’e.

Imajen kultura Timor-Leste ne’ebé tau iha Universidade Honai Vietname iha ámbitu komemorasaun loron mundiál língua Portuguesa. Imajen/ Hortencio Sanchez

Serimonia ne’e organiza hosi Universidade Hanoi liuhosi Departamentu Portugés no hetan apoia fundu hosi Embaixada Timor-Leste, Mozambique, Brázil, Angola no Konsul onorária Portugál nian iha sidade Watcimin no Konsul onorária Guine Bisau.

Fundu ba atividade ne’e kontribui hosi Embaixada nasaun membru CPLP ne’ebé daudaun ne’e hala’o hela misaun iha Vietname hamutuk $1.000-resin hodi komemora loron mundiál ne’e.

“Eventu ida ne’e sira sempre selebra kada tinan no ita sente orgullu tebes tanba estudante Vietnamita barak ko’alia lian Portugés kapaas tebes, ita fó parabéns tanba sira rasik hakarak aprende lian ida ne’ebé ita uza ba lian ofisiál,” nia afirma.

Ámbitu selebrasaun ne’e fahe mós sertifikadu ba manán nain-sira iha kompetisaun ne’ebé ba konkursu lian Portugés kona-ba CPLP nian.

Totál alunu iha Departemantu Portugés hamutuk 200-resin, maibé na’in-14 de’it mak tuir kompetisaun Portugés no na’in tolu de’it mak sai hanesan manán nain. Enkuantu hosi na’in-14 ne’e mane na’in-rua no feto na’in-12.

“Redasaun ne’ebé estudante sira halo kona-ba lian Portuguesa, ami hosi Embaxada haat mak kurize ba sira nia materiál kompetisaun nian no iha na’in-tolu mak sai vensedor,” nia akresenta.

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here