Sobrevivente Masakre Santa Kruz 12 Novembru, Simplicio Celestino de Deus baixa hela iha HNGV tanba sofre moras stroke.. Imajen/Espesial

DILI, 10 maiu 2022 (TATOLI)— Diretór Klíniku Hospitál Nasionál Guido Valadares (HNGV), Marcelino Correia, informa ba sobrevivente (mate restu) Masakre Santa Kruz 12 Novembru, Simplicio Celestino de Deus baixa hela iha HNGV tanba sofre moras stroke.

“Mate restu 12 novembru Simplicio nia família lori mai iha Departamenntu Emerjénsia Banku urjénsia, hodi hetan tratamentu saúde hosi Doutór espesialista, hafoin muda ba ona ba baixa iha VIP Hospitál Nasionál Guido Valadares (HNGV) tanba moras stroke,” Diretór Klíniku HNGV ne’e informa ba Agência TATOLI iha Novo Turizmu, tersa ne’e.

Médiku sira suspeita sobrevivente ne’e ho moras stroke, nune’e médiku espesialista sira kontinua halo observasaun médiku.

Tuir nian halo tranferénsia pasiente ba rai li’ur ne’e depende ba médiku sira tanba sei iha faze observasaun no bainhira iha indikasaun atu transferénsia bele dezloka ba estranjeiru hodi halo tratamentu médiku.

“Maibé, daudaun haree lai nia moras atuál atu redús nia probelma ne’e hotu, hafoin tratamentu kontinuasaun mak deside hosi médiku espesialista sira,” nia afirma.

Eis Deputadu “Liurai Tasi” alta ona

Komisáriu CFP emposadu, Fausto da Silva ‘Liurai Tasi’. Imajen Tatoli/Egas Cristovão

Alende ne’e, Eis Deputadu IV Lejizlatura no atuál Komisáriu Komisaun Funsaun Públika (CFP,sigla Portugés), Fausto Freitas da Silva “Liurai Tasi”  mós halo tratamentu saúde iha HNGV tanba sofre moras hipertensaun.

“Eis Deputadu no membru CFP “Liurai Tasi”, mós ohin ba kontrola moras tensaun iha Hospitál Nasionál Guido Valadares (HNGV), maibé alta no fila ba uma ona tanba kondisaun saúde di’ak,” Diretór ne’e akresenta.

Fausto Freitas da Silva “Liurai Tasi” moris iha Quelicai, Munisípiu Baucau iha loron 7 abríl 1963, abilitasaun literária Mestradu iha Jestaun Rekursu Umanu. Liurai Tasi eleitu nu’udar Deputadu iha IV Lejizlatura.

Jornalista :  Felicidade Ximenes

Editór       :  Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here