Plenária Parlamentu Nasionál. Imajen Tatoli/António Gonçalves.

DILI, 11 maiu 2022 (TATOLI)—Proposta hitu ne’ebé aprezenta hosi deputadu sira bankada opozisaun iha Parlamentu Nasionál durante debate faze espesialidade ba proposta Orsamentu Retifikativu la pasa.

Hanesan proposta númeru 5 títulu (servisu/órgaun) dotasaun para Todo o Governo ho kategória despeza transferénsia públika ho nia programa kódiku AA7 medida orsamentál komplementár, dotasaun inisiál $1,124,757.250 ho alterasaun  propoin atu hasai  tiha $500.000 ne’ebé  ho nia justifikasaun sumáriu iha aditamentu livru 1- panorama orsamentál Orsamentu Jerál Estadu (OJE) 2022, Governu justifika introdusaun programa foun AA7 medida orsamentál komplementár engloba diferensa medida, inklui kriasaun Sekretária Estadu Asuntu Traballadór iha Estranjeiru, nune’e propoin elimina medida ne’e.

Proposta númeru 6, títulu servisu dotasaun Todo o Governo, kategória despeza transferénsia públika ho programa kódiku AA7 medida orsamentál komplementár, dotasaun inisiál $1,124,757.250 ho alterasaun hasai $3,100.000 ne’ebé ho nia justifikasaun engloba dotasaun medida diferensa inklui millaun $1 ba garante internet iha eskola no universidade no millaun $2,1 apoiu programa home schooling husu elimina medida rua ne’e tanba sei la lori benefísiu.

Proposta númeru 7, programa AA7 medida orsamentál komplementár, dotasaun inisiál $1,124,757.250 alterasaun hasai $6,400.000 ho justifikasaun sumária atu hasai orsamentu destina ba programa apoiu plantasaun kafé tanba programa ne’e konsta ona iha OJE 2022.

Proposta númeru 8, programa AA7 medida orsamentais komplementár, dotasaun inisiál kategória $1.124.757.250 no alterasaun atu hasai $70.000.000 ne’ebé ho nia justifikasaun pagamentu desimu terseiru iha fulan dezembru ba kada família tanba Governu la aprezenta númeru família abranje hosi prezente medida.

Proposta númeru 9 husu hasai osan millaun $25 ba alargamentu programa UKL Plus ne’ebé proporsiona materiál konstrusaun  hodi hadi’a kondisaun uma maibé proposta ne’e husu atu elimina tanba  orsamentu refere programa ne’e konsta ona iha OJE 2022.

Proposta númeru 10 husu alterasaun hasai $1,000,000.000 kriasaun fundu kombatente libertasaun nasionál atu elimina ne’ebé finalidade no karáteristika nesesita presedida alterasaun lei númeru 3/2006, 12 abríl (Estatutu Kombantente Libertasaun Nasionál), no razaun seluk mak estudu ekonomiku no finanseiru kona-ba aplikasaun verba transferénsia ho forma garante rentabilidade anuál fundu petrolíferu.

Proposta númeru 11 mak atu hasai $7,200.000 ba finansiamentu suplementár postu administrativu propoin hasai tanba Governu la esplika medida ne’e ho nia benefisiáriu hira.

Proposta hirak ne’e aprezenta hosi proponente Deputada CNRT Maria Fernanda Lay, Deputadu PD António da Conceção, Deputadu UDT Francisco Xavier, Deputada FM Isabel Ximenes no Deputada CNRT Virgina Ana Belo.

“Urjente saida mak tau iha Orsamentu Retifikativu. Osan ne’ebé tama dezde tinan barak ita-nia populasaun ba servisu iha rai-li’ur, nusa foin hakfodak tau iha retifikativu la tau iha Orsamentu Jerál Estadu depois kurije tiha organika Governu,” Deputada proponente, Fernanda Lay, fundamenta iha sala plenária Parlamentu Nasionál durante debate proposta OR iha faze espesialidade ba loron dahuluk, tersa ne’e.

Tuir nia, adidu iha embaixada hotu no Ministériu Negósiu Estranjeiru no Kooperasaun (MNEK) no SEFOPE nia servisu iha ona tanbasá kria tan ida-ne’e.

“Ida ne’e interpretasaun atividade la klaru, atu aumenta postu rekrutamentu ha’u la hatene ne’ebé konkorda ho KHUNTO SEFOPE halo hela servisu ne’e, nune’e tanbasá kria tan ida,” nia dehan.

Deputada proponent, Isabel Ximenes, hateten sira-nia proposta ba área edukasaun atu haree kestaun ne’ebé iha sustentavel.

“Iha ami-nia proposta ne’ebé hato’o liga ba kestaun problema audiénsia hato’o ne’ebé ami kontinua haree katak situasaun ida-ne’e agora ita-nia área edukasaun enfrenta hela problema barak ne’ebé urjénsia importante atu resolve, duké ita ba aumenta tan programa home schooling ida-ne’ebé karik ninia solusaun ne’ebé sei laiha sustentavilidade ba oin,” nia hateten.

Durante audiénsia la hetan esplikasaun klaru programa eskola iha uma atu halo modelu oinsá no realiza iha ne’ebé ho númeru estudante hira, tanba ne’e mak sente programa home schooling seidauk iha nia viabilidade atu implementa.

“Ami iha hanoin, se Governu hakarak hadi’a ita-nia setór edukasaun rezolve mak problema pagamentu sira-ne’ebé seidauk halo ba ita-nia profesór kontratadu. Ne’ebé, se bele Governu hanoin ema mak sai sentru ba dezenvolvimentu hasa’e mak saláriu profesór,” nia fó hanoin.

Nune’e mós, Deputada proponente, Virgina Ana Belo, hateten liga ba proposta númeru 7 deskreve ona iha justifikasaun sumáriu tanba haree ba situasaun natar no irrigasaun no mós ita-nia ai-han sira seluk fora hosi kafé presiza tebe-tebes atensaun, nune’e presiza foku ba ida-ne’e.

“Ami mós hakarak ko’alia uitoan tanba realidade orsamentu ne’ebé tau iha 2021-2022 ba iha ministériu ne’e rasik to’o agora foin ezekuta 17%. Se ita tau tan orsamentu ba iha ne’ebá mak kapasidade ezekusaun oinsá,” nia argumenta.

Nia sujere, se hakarak foku ba kafé ne’e halo de’it ezersísiu interna bele foti fali hosi ministéiru nian labele ezekuta iha 2022 tau fila-fali plantasaun kafé nian, tanba laiha esplikasaun iha audiénsia.

Hatán ba ne’e, Primeiru Ministru (PM), Taur Matan Ruak, hateten Governu la aseita atu koa orsamentu ne’e hosi proposta sira hosi deputadu opozisaun.

Nia komenta, proposta númeru 5 katak integrasaun rejional Timor-Leste nian ita halo iha pontu haat importante, mak defende prestijiu hanesan nasaun no povu, oinsá hametin relasaun ho nasaun sira bilaterál no multilaterál, estabelese akordu kooperasaun iha defeza no seguransa no ikus mak tau matan ba komunidade nian iha diáspora.

“Iha ne’e, hau la ko’alia traballadór refere karik iha lapsu ida maibé komunidade iha diáspora no ita iha komunidade barak to’o agora la tau atensaun loos no tempu vota mak husu de’it sira-nia votu, nune’e hanoin momentu oportunu atu bele tau matan konta mós ho sira-nia kontribuisaun iha 2021. Reseita ne’ebé ita simu hosi ita-nia komunidade diáspora nian hamutuk millaun $121 ne’ebé kontribui ba dezenvolveimentu nasaun no redusaun probreza ho ida-ne’e merese tau matan tanba ne’e proposta refere laiha kabimentu (laiha baze legál),” Xefe Governu ne’e hateten.

Biban ne’e, Ministru Edukasaun (ME), Armindo Maia, esplika porgrama home schooling hanesan ema hotu hatene durante ne’e ministériu iha programa ne’ebé bolu ‘eskola hosi uma’ ne’ebé prodús hosi televizaun durante konfinamentu obrigatóriu.

“Maibé ho situasaun ne’ebé fila ona ba normál entaun introdús fali konseitu eskola iha uma, katak agora mestre sira sei ba halo prosesu aprendizajen iha uma tanba labarik barak la konsege ba eskola tanba ekonomia la sufisiente, no ita mós hatene labarik sira-ne’ebé atu tama pre-eskolár, ensinu aprendizajen idade kiik. Entaun, ita introdús konseitu eskola iha uma maibé la’ós buat foun hanesan ita hatene profesór barak ba iha ne’ebá voluntáriu lista lubuk, entaun hahú hosi Dili populasaun barak hanesan projetu pilotu,” nia esplika.

Vise-Ministru Agrikultura no Peska (MAP), Abilio de Araújo, responde hanoin liga proposta ne’ebé iha maibé atu haree hikas fila-fali nasaun Timor-Leste durante ne’e, kuaze produtu kafé por volta millaun $20 hektare ne’ebé iha, nune’e presiza halo fila-fali refloresta hodi bele rekupera saida mak lakon tempu liu.

Aleinde ne’e iha mós parte balun ema tenke preokupa ba folin kafé ne’ebé prodús mai hosi animál lakon tiha ne’ebé nia folin diferensa ho folin normál sira seluk, tanba ne’e presiza apoiu bele vota a-favór ba orsamentu aumenta.

Ministru Administrasaun Estatál (MAE), Miguel Ferreira de Carvalho, hakarak klarifika proposta númeru 8 ne’ebé iha ligasaun ho papél MAE nian.

Nia dehan, to’o iha 28 fevereiru 2022, ministériu servisu hamutuk ho líder komunitáriu hosi suku hotu iha territóriu hetan ona dadus família ne’ebé iha ficha família hamutuk 323.216, no dadus ne’e kompara ho MSSI utiliza hodi selu subsídiu $200 ba família iha 2020.

“Purtantu bazea ba númeru ne’e Ministéiru Finansa no MSSI kalkula kuaze millaun $65 ne’ebé sei utiliza ba despeza ba pagamentu $200, nune’e MAE sempre servisu hamutuk ho ministéiru ba dadus sira sempre disponivel bele utiliza distribui programa sira diretamente ba povu,” nia dehan.

Hatán ba proposta númeru 9 hosi razaun ne’ebé proponente sira aprezenta, nia hateten Uma Kbiit Laek (UKL) tinan 2021-2022 ne’e Paralamentu Nasionál (PN) aprova ho orsamentu millaun $71 hodi konstrui uma 4000 iha suku 224, ne’ebé transfere ona ba suku sira hahú konstrusaun ho totál despeza hamutuk 45,5% no 55% sei hahú transfere iha fulan maiu ne’e nia laran, nune’e orsamentu refere destina ona.

“Agora ba UKL Plus destina atu ba sira-ne’ebé la halo parte ba UKL, tan ne’e UKL iha komponente rua hanesan esplika iha sesaun audiénsia primeiru ne’e, ita fó materiál konstrusaun tomak ba família sira hodi halo sira-nia uma rasik no segundu ita fó de’it materiál konstrusaun kalen hodi populasaun uza troka. Ami planea osan millaun $25 bele utiliza kobre materíál konstrusaun tomak ne’ebé estimativa uma ida sei hetan kustu rihun $3,” nia hateten.

Kona-ba proposta 11 programa mão de obra postu administrativu ho objetivu hadi’a kondisaun servisu postu no fó kbiit ba administrasaun postu kontribui rekuperasaun ekonomia no preparasaun ba desentralizasaun administrativa atende situasaun urjente sira-ne’ebé liga ho seguransa, ambientál, floresta, infraestrutura rurál ho seluk tan.

“Tanba ne’e, parte Governu la aseita proposta hirak ne’e,” nia dehan.

Hafoin Governu fó resposta, proponente Deputada Fernanda Lay deside retira proposta númeru 8 no sira seluk mantein hodi avansa ba iha votasaun plenária.

Rezultadu votasaun ba proposta sira ne’e iha proposta tolu mak ho votu a-favór 24, kontra 36, abstensaun rua (2), no proposta tolu seluk ho votu afavór 25, kontra 36, abstensaun ida (1), nune’e proposta neen ne’e la hetan aprovasaun iha plenária, ne’ebé aprezenta hosi deputadu sira bankada opozisaun.

 Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here