Imajen/Media PR.

DILI, 10 maiu 2022 (TATOLI)—Deputadu sira iha uma fukun Parlamentu Nasionál, tersa ne’e, liuhosi diskusaun debate espesialidade aprova proposta Orsamentu Retifikativu adisionál $58.653.497,65 ba Ministéiru Obras Públika (MOP), ho votu a-favór 35, kontra 21 no abstensaun neen (6).

“Nune’e proposta númeru 2 pasa,” Prezidente Parlamentu Nasionál, Aniceto Longuinhos Guterres Lopes, deklara iha plenária durante diskusaun debate proposta Orsamentu Retifikativu iha faze espesialidade loron dahuluk, tersa ne’e.

Deputadu proponente hosi Deputadu PLP Francisco de Vasconcelos, Deputadu Fretilin Favião Oliveira ho Deputada KHUNTO, Olinda Guterres, hato’o proposta númeru 2 títulu Ministéiru Obras Públika (MOP), kategória despeza transferénsia públika ho programa kódigu 802, eletrisidade dotasaun inisiál $90,000.000 alterasaun aumenta $58,653,497.65 nune’e dotasaun finál $148,653,497.65.

Programa ho kódigu 802 eletrisidade adisionál aumenta $49,653,497.65, programa eletrisidade, sub-programa enérjia eletrika no atividade fornesimentu enerjia eletrisidade adisionál aumenta $6,000,000 (rubrika materiál fornesimentu/operasionál), ho programa no nia atividade nafatin adisionál aumenta $3,000,000 (rubrika materiál fornesimentu/operasionál).

Sumáriu justifikasaun aumenta osan ba iha MOP hodi halo transferénsia públika ba EDTL-EP ba kompra kombustível ba sentral Hera, Betano no Ataúro tanba impaktu hosi presu mina mundiál ne’ebé sa’e makaas.

Aprezenta mós katak tinan 2022 totál kombustível ne’ebé sei fornese ba sentrál Hera, Betano no Ataúro hamutuk 149,739,135 litru no presu estimativa ba kombustivel ne’ebé planea mak $0.8584 kada litru ho estimativa ne’e iha tinan ne’e totál orsamentu ba kombustível $128,536,073.00.

Impaktu mina mundiál ne’ebé mak aumenta hosi $0,8584 kada litru sa’e ba $1,19 kada litru, halo aumenta mós ba orsamentu ba kombustível hosi $128,536,073.00 sa ba $178,189,570.65 ho ida ne’e maka EDTL-EP hato’o proposta aumenta tan orsamentu ba kombustível hamutuk $49,653,497.65.

Hosi istimasaun refere, se laiha adisionál orsamentu ne’ebé mak mensiona fulan haat sentrál Hera, Betano no Ataúro sei labele opera hahú hosi fulan setembru to’o dezembru tinan ne’e, no  proposta materiál fornesimentu operasionál fahe ba rua hanesan fornese no instala transformadór 60 MVA iha sentru Camea ho montante milaun $6 no sosa materiál programa eletrifikasaun aldeia ho montante millaun $3.

Ministru MOP, Salvador Pires, hateten nia parte laiha objesaun ba proposta ne’e no aseita hodi garante funsionamentu sentrál elétrika sira iha Timor-Leste.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here