Ministru Transporte no Komunikasaun, José Agustinho da Silva. Imajen Tatoli/Egas Cristóvão

DILI, 10 maiu 2022 (TATOLI)–Ministru Transporte no Komunikasaun (MTK), José Agustinho da Silva, informa, nia parte simu ona pedidu hosi empreza indonéziu, hodi Aviaun Batik halo operasaun hosi Indonézia mai Timór.

“Ha’u simu ona pedidu balun no ha’u hatún ona despaisu katak iha tempu badak sei iha aviaun foun ida hosi Indonézia, mak Batik Airline. Prosesu oras ne’e iha hela Autoridade Aviasaun Sivil Timor-Leste (AACTL, sigla portugés),” Ministru hateten iha resintu Parlamentu nasionál, tersa ne’e.

Notísia relevante: Timor-Leste no Austrália lansa voo dahuluk QANTASLINK ho destinansaun Dili-Darwin

Nune’e, governante ne’e espera aviaun ne’e bele asegura konetividade via aérea.

“Aviaun sira seluk ne’ebé antes ne’e semo mai, maski ita alerta ona maibé sira seidauk hato’o fali pedidu. Ida-ne’e depende ba sira, ita labele obriga tanba ema-nia aviaun,” nia akresenta.

Tuir Ministru, durante ne’e Timor-Leste iha ona akordu servisu aéreu ho Indonézia maibé Parlamentu Nasionál seidauk ratifika, maibé Governu Indonézia durante ne’e dezigna aviaun Citilink ho Sriwijaya halo operasaun mai Dili.

“Iha períodu COVID-19, voo komersiál paradu no agora tama ba normalidade Autoridade Aviasaun alerta ona ba nasaun membru ICAO katak ita-nia aeruportu iha loron hirak liubá nakloke ona ba aviaun sira halo voo komersiál, liuliu ba hirak ne’ebé iha ona akordu servisu aéreu ho Timor-Leste, maibé aviaun sira hosi Indonézia seidauk hato’o pedidu mai,” nia esplika.

Durante ne’e Timor-Leste iha konetividade aérea ho Indonézia, Malázia no Austrália, enkuantu ho Austrália iha ona voo komersiál tanba fulan hirak ba kotuk Parlamentu Nasionál ratifika ona akordu servisu aéreu entre país rua nu’udar baze ba Governu Austrália dezigna Qantas Airline hodi asegura konetividade entre Dili-Darwin.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here