Prezidente KFP, Faustino Cardoso. Imajen Tatoli/Celestina Teles.

COVALIMA, 10 maiu 2022 (TATOLI)—Komisaun Funsaun Públika (KFP) servisu hamutuk ho ILO no SEII disemina informasaun promove integridade funsionáriu públiku hodi hapara violénsia no asédiu seksuál iha mundu traballu ba funsionáriu públiku (FP) sira iha Covalima.

“Nu’udar funsionáriu públiku no kargu xefia bele hatene prátíka hahalok no atitude ne’ebé katégoria violénsia asédiu seksuál. Bainhira sira komprende no hatene ona, ita hein katak sira hotu bele sai sensibilziadu no bele haklaken liután,” Prezidente KFP, Faustino Cardoso, hateten ba jornalista sira, iha salaun Administrasaun Covalima, tersa ne’e.

Ho diseminasaun informasaun refere, bele evita ema monu iha tensaun ne’ebé kategória violénsia asédiu seksuál iha fatin servisu, uma-kain hodi bele hadook an hosi inflasaun dixiplinár irregularidade iha servisu fatin.

“Problema asédiu seksuál kestaun mundiál no ema hotu hasoru no sai preokupasaun ita-hotu nian atu sensibilzadu hodi evita monu iha irregularidade prátika asédiu seksual. Signifika iha fatin servisu akontese duni,” nia dehan.

Hahalok asédiu seksuál envolve hahalok seksuál naran deʼit neʼebé ema halo lahó lisensa inklui book ka kaer-kona eme-nia isin ka koʼalia liafuan kro’at neʼebé liga ho buat seksuál nian.

Iha diseminasaun ne’e aprezenta oradór hosi International Labour Organization (ILO) ne’ebé ko’alia kona-ba “Eliminasaun no asédiu iha mundu traballu”, oradór hosi Komisaun Funsaun Públika (KFP) aprezenta topiku “Hateten lae ba asédiu seksuál” no pontu vokal hosi Sekretária Estadu Igualdade no Inkluzaun (SEII) Covalima lori topiku “Politíka no estratejia SEII hapara gender based violence”.

Reprezentante ILO iha Timor-Leste, Margared Araújo informa, iha 21 juñu 2019 iha konferénsia internasionál Trabalu adota konvensaun kona-ba eliminasaun violénsia no asédiu iha mundu trabalu, númeru 190 hamutuk ho nia rekomendasaun númeru 206.

Konvensan númeru 190 adota ho votu a-favór 439, kontra 7 abstensaun 30 no rekomendasaun númeru 206 adota ho votu a-favór 397, kontra 12 no abstensaun 44.

Atividade ne’e partisipa hosi administradór postu administrativu Fatululik, Fatumean, Fohorem, Maucatar, Suai Villa, Tilomar no Zumalai, kargu xefia sira no funsionáriu iha munisípiu Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here