Jogador Indonézia selebra golu kontra Timor-Leste iha jogu datoluk SEA Games.Imajen/espesial

VIETNAME, 10 maiu 2022 (TATOLI)– Ekipa Timor-Leste ho naran istimadu “Crocodilo” U-23, ne’ebé lidera hosi treinador Fabio Joaquim Maciel da Silva,  tersa kalan ne’e , obrigadu tenke sofre golu 1-4 kontra adversariu  Indonézia iha jogu datoluk SEA Games, iha Estadiu Nasional Vietname. 

Ho derrota ne’e ekipa Timor-Leste iha esperansa mihis tebes atu ultrapasa ba jogu tuir mai tanba jogu dala tolu lakon tutuir malu no okupa de’it tabela klasifikasaun ho pontu mamuk.

Notísia relevante: TL lakon ho Myanmar 2-3 iha jogu daruak SEA Games

Minutu primeiru hahú ekipa rua lansa kedan kontra no atake ba malu tuir tekniku no abilidade ne’ebé haraik ona hosi treinadór ba sira.

Timor-Leste halo presaun makas tebes ba ekipa Garuda Indonézia iha minutu 2, jogadór Indonezia halo falta hasoru jogadór Mozinho Barreto de Lima (10) iha grande area laran.

Erru ne’e makas tebes, nune’e árbitru deside penalidade ba Timor-Leste. Iha ne’ebé ezekuta hosi Mozinho maibé la konsege fó ksolok ba Timor – Leste tanba sutu livre ne’ebé Mozinho halo guarda rede Indonezia baku sai bola.

Ho nune’e Timor-Leste la konsege muda rezultadu ne’ebé iha mantein ho 0-0. Miabé Indonézia halo presaun makas tebes ba Timor-Leste iha minute 10 ba leten hodi halo jogadór timoroan sira book-an la di’ak.

Hosi presaun ne’ebé Indonézia halo la hela de’it hanesan presaun tanba iha minutu 16 jogadór Indonezia Egy Maulana (10) les ona rede Timor – Leste nian muda rezultadu ba 0-1.

Golu ne’e halo jogadór Timor-Leste nia vontade ladun iha no Indonezia halo ameasa barak ba rede Timor – Leste nian. Sutu barak mak Egy Maulana lansa maibé sutu hirak ne’e nunka kona iha alvu.

Ho nune’e rezultadu primeira parte obrigadu tenke termina ho 0-1 no Indonéziaprovizoriu lidera jogu.

Hakur ba segunda parte ekipa rua nafatin lansa kontra no atake ba malu, maibé Indonézia forte liu halo kontra atake ofensivu ne’ebé makas ho nune’e iha minute 52 Wintan Sulaeman (8) lansa tan golu ida muda rezultadu ba 0-2.

Jogu lao manas liutan, trainadór Timor-Leste Fabio Maciel halo esforsu muda estratejia jogu maibé labele nafatin sobu Garuda nia jogu ho nune’e iha minute 58 Fachruddin Aryanto (19) halo tan golu ida dudu rezultadu sae liu ba 0-3.

Esperansa Timor-Leste nian nafatin iha la sente kole no baruk nafatin duni tuir bola halo kontra no atake makas atu hasai Timor-Leste hosi derrota ne’e maibé luta sira ne’e labele akontese, maski iha minute 69 jogadór Timor-Leste Mozinho de Lima (10) lansa golu ida hodi muda rezultadu ba 1-3.

Golu ne’ebé Mozinho lansa laiha kbiit atu muda vitoria ne’ebé Indonézia iha,  basa defeza Indonézia nian metin no susar tebes ba jogadór Timor-Leste nian atu fera.

Maibé kbiit joguIndonézia nian boot ba bebeik nune’e iha minute 77, Wintan termina Indonézia nia golu ikus hametin kedan rezultadu ba 1-4 too jogu termina laiha tan golu ruma mak akontese tan Timor-Leste tenke simu realidade lakon.

Fó hanoin fali durante jogu internasioal dala hira ona Timor – Leste ho Indonézia hosi U-23 too senior Indonezia nunka lakon ho Timor-Leste no istoria nafatin metin ba nasaun rua ne’e iha mundu futeból.

Daudaun ne’e iha grupu A Myanmar mak provizoriu lidera tabela klasifikasaun ho pontu neen, segundu Vietname pontu hat, terseiru Filipina pontu haat, kuartu Indonezia pontu tolu no Timor-Leste pontu ikus liu zero.

Notísia relevante: Jogadór na’in-neen pozitivu COVID-19, TL derrota kontra Filipina 0-4

Jornalista : Hortencio Sanchez

Editór       :  Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here