INCSIDA, IP, sensibiliza informasaun kona-ba HIV-SIDA iha Pante Makasar. Imajen Tatoli/Abílio Elo Nini.

OÉ-CUSSE, 10 maiu 2022 (TATOLI) – Institutu Nasionál Kombate Human Immunodeficinecy Virus-Sindrome da Immunodeficinecy Adquirida (HIV-SIDA), Institutu Públiku (INCSIDA, I.P), tersa ne’e hala’o sensibilizasaun kona-ba transmisaun virus HIV-SIDA iha salaun Alfandega Palaban Rejiaun Administrativa Espesiál Oé-Cusse Ambeno.

Sensibilizasaun ne’e realiza ba estudante sekundáriu públiku iha Oé-Cusse, kargu diretór, xefe departamentu hamutuk ho autoridade komunitáriu, no seguransa hosi Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL).

Iha okaziaun ne’e, Prezidente INCSIDA, I.P, Atanasio de Jesus, haktuir bazea dekretu lei númeru 13, 27 novembru/2013, fó dalan ba INCSIDA, I.P atu hala’o atividade sensibilizasaun no prevensaun iha territóriu nasionál.

Nune’e bazea nia misaun no vizaun maka atu hapara HIV-SIDA no transmisaun iha Timor-Leste, ho nia meta maka sidadaun hotu iha munisípiu 12 no RAEOA, presiza hamutuk habelar informasaun iha sosiedade.

“Ohin, hamutuk iha Oé-Cusse, mai atu konvida ni fanun ita hotu atu hapara transmisaun ba virus ne’e, tanba ita-nia dadus infetadu ba kazu HIV-SIDA sa’e maka’as tebes, desde 2003, ita deteta kazu númeru ki’ik, maibé kada tinan ita-nia dadus ne’e aumenta ba beibeik, nunka tún, entaun INCSIDA, I.P, komesa halo sensibilizasaun iha territóriu tomak atu konvida ita hotu hodi hamutuk hapara transimisaun ba virus HIV-SIDA,” Atanasio de Jesus, ko’alia iha sensibilizasaun ne’e

Nia fó-sai katak, dadus ne’ebé INCSIDA rejista iha 2022 ne’e hamutuk ema na’in-1.526, ne’ebé rekolla hosi 12 munisípiu inklui RAEOA, mesak ema Timor-oan de’it no na’in-166 mate ona, halo hela tratamentu ai-moruk ARB iha 719.

Kona-ba idade produtiva iha Timor-Leste, labarik idade hosi 14 to’o 24, kuaze 30% infetadu ba iha virus HIV-SIDA, entaun ne’e joven la’ós prepara nasaun ba futuru maibé joven falla ona,

“Iha dadus kona-ba balu sei pozitivu hela maibé lakohi koopera ho fasilidade saúde, nune’e profisionál saúde, rejista ona sira-nia identidade, hela fatin no buka tuir sira atu nune’e hakbesik fali ba fasilidade hetan tratamentu,” nia katak.

Nune’e meiu atu trava virus ne’e, esforsu koletiva, la’os instituisaun relevante sira-nia servisu, maibé responsabilidade ema hotu nian, tan ne’e bazea tema ne’e foti maka, mai ita hamutuk hapara transmisaun HIV-SIDA iha Timor-Leste.

Sekretáriu Rejionál ba Asuntu Saúde, Manuel da Costa, agradese tanba bele fahe informasaun ba komunidade no estudante sira iha Oé-Cusse, atu kontinua habelar ba inan-aman sira.

“Sensibilizasaun importante, ita tenke atensaun, tenke kria sensibilisaun ba informasaun sira ne’e, nune’e ita hotu konsiénsia kuida ita-nia an, família kuida komunidade atu moris nasaun ne’e ho saudável,” nia katak.

Tuir dadus iha servisu saúde Oé-Cusse rejista hosi 2013 hamutuk kazu 39, kazu ne’e espalla iha sub-rejiaun haat, Oésilo Pássabe, Nítibe no Pante Makasar, no iha mate na’in-10, no iha tinan 2021 hetan na’in-10, agora tinan ne’e foin tama trimestre dahuluk rejista ona na’in-haat (4), aumenta abríl to’o agora hetan ona na’i-rua (2) hamutuk neen (6),

Jornalista       : Abílio Elo Nini
Editór             : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here