Osan Dolar Amérika. Imajen/Espesiál

DILI, 10 maiu 2022 (TATOLI)—Oitavu Governu Konstitusionál foti orsamentu $2,441,244.517 hosi fundu mina-rai hodi finansia Orsamentu Jerál Estadu (OJE) 2022 ba iha proposta Orsamentu Retifikativu (OR).

Notisia Relevante: PN aprova proposta Orsamentu Retifikativu iha Jeneralidade

Parlamentu Nasionál, tersa ne’e,  liuhosi diskusaun espesialidade aprova ho votu afavór 36, kontra 18 no abstensaun neen (6) ba tabela II-Reseita órgaun no servisu administrasaun sentrál ho nia deskrisaun hanesan kategória rubríka  reseita petrolífera $2,441,244.517 ne’ebé foti hosi transferénsia fundu petrolíferu $2,441,244.517, transferénsia superiór Rendimentu Sustentavél Estimadu (RSE) $1,887,166.941.

“Nune’e Tabela II-Reseita Órgaun no Servisu Administrasaun Sentrál aprovadu,” Prezidente Parlamentu Nasionál, Aniceto Longuinhos Guterres Lopes, deklara liuhosi plenária.

PN mós aprova mós ho votu a-favór 38, kontra neen (6) no abstensaun 15 ba anexu Tabela I reseita no despeza setór administrativu kategoria reseita globál $3,308,799.841, reseita globál konsolidada $3,236,717.481, administrasaun sentrál $2,989,335.197, despeza globál $3,308,186,041, despeza global konsolidada $3,236,103.681 no administrasaun sentrál $2,989,335.197.

Ba proposta lei númeru 38/V(4a) 1/2022, primeiru alterasaun lei númeru 1/2022, 3 janeiru, OJE 2022, segundu alterasaun lei númeru 8/2008, 30 juñu, Lei Tributária, no kriasaun Fundu Kombantete Libertasaun Nasionál, ne’ebé PN aprova mós artigu 1 kona-ba objetu presente diploma.

Entertantu, iha debate espesialidade ba proposta orsamentu retifikativu  ho karáter urjénsia ba loron dahuluk ne’e hahú debate ba proposta lei  númeru 38/V(4a) 1/2022, primeiru alterasaun lei númeru 1/2022, 3 janeiru, OJE 2022, segundu alterasaun lei númeru 8/2008, 30 juñu, Lei Tributária, no kriasaun Fundu Kombantete Libertasaun Nasionál ne’ebé hamutuk ho nia artigu lima, hahú hosi Kapítulu I Dispozisaun inisiál ho nia artigu ida, Kapítulu II Alterasaun Lejislativa ho nia artigu rua, Kapítulu III Fundu Kombatente Libertasaun Nasionál ho nia artigu ida no Kapítulu IV Dispozisaun Finál ho nia atigu ida.

Tanba ne’e, debate espesialidade ne’e hahú hosi dispozisaun inisiál ho nia artigu sei to’o ba iha dispozisaun finál.

Aleinde iha mós proposta hamutuk 19 hosi deputadu sira-ne’ebé meza plenária admite halo diskusaun mai hosi deputadu bankada Governu no mós opozisaun.

Prezidente Parlamentu Nasionál, Aniceto Longuinhos Guterres Lopes, fó sai katak proposta hirak ne’e mak kumpre regra no oráriu meza admite hodi bele diskute.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here