Reitór UNPAZ, Adolmando Soares Amaral. Imajen Tatoli/Egas Cristóvão

DILI, 10 maiu 2022 (TATOLI)—Universidade da Paz (UNPAZ) sei destaka estudante iha instituisaun públiku no privadu atu hala’o estájiu sosiál.

“Ita-nia estájiu sosiál ba estudante sira ne’e sei hahú iha loron 25 maiu, durante fulan-ida. Ita sei destaka estudante hamutuk 1.310 ba instituisaun sira,” Reitór UNPAZ, Adolmando Soares Amaral, informa ba Agência Tatoli, tersa ne’e.

Notísia relevante: UNPAZ halo pagamentu inzensaun propina semestre par ba estudante 9.167

Tuir Reitór, estudante sira ne’ebé sei partisipa programa estájiu sosiál, ba hirak ne’ebé tama ona semestre hitu atu tama ona ba ualu, ne’ebé atividade ne’e rasik sei hala’o iha kapitál Dili tanba haree ba situasaun la permite estudante sira hala’o viajen ba munisípiu sira.

Maibé antes ne’e universidade privada ne’e haruka ona ninia estudante 1.000 resin hosi semestre lima atu tama ba neen hodi hala’o estájiu profisionál iha instituisaun públiku no privadu sira durante fulan-ida, ne’ebé daudaun termina ona no agora filafali ona ba universidade.

Estudante UNPAZ ne’ebé hala’o ona estájiu no atu hala’o iha instituisaun públiku no privadu sira iha kapitál Dili hamutuk 2.000 resin.

Programa ne’e universidade realiza atu hasa’e abilidade estudante sira, nune’e baihira termina estudu bele iha ona esperiénsia.

Jornalista : Tomé Amado      

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here