Aktividades vendedor sira faan bandeira nasional iha estrada ninin area kolmera, Dili.Imajen Tatoli/Antonio Daciparu.

DILI, 10 maiu 2022 (TATOLI)—Centro Juventude Becora (CJB), suku Becora, postu administrativu Cristo Rei, munisípiu Dili, sei komemora loron restaurasaun independénsia ba dala-XX (20 maiu 2002-20 maiu 2022) ho atividade mini feira, nune’e bele anima komunidade iha Cristo Rei.

“Iha selebrasaun 20 maiu, ita sei halo eventu nasionál, tanba loron boot ida importante ba ita hotu. Tanba ne’e, Sentru Juventude Becora servisu hamutuk ho Autoridade Lokál Cristo Rei, iha hanoin ida hakarak mós halo animasaun ida ba komunidade. Ho ne’e, ita hamosu ideia ida hakarak hasa’e kresimentu ekonomia ba komunidade iha Becora, hodi haree ba ita-nia situasaun atuál ida agora. Tanba ne’e, ita iha inisiativa ida loke mini feira ne’ebé liga ba 20 maiu,” Diretór Ezekutivu Centro Juventude Becora (CJB), Flávio Sebastião da Costa, informa ba Agência Tatoli, iha nia knar fatin, Becora, Dili, tersa ne’e.

Preparasaun ba eventu nasionál ne’e, halo ona iha semana ida-nia laran hanesan estrutura, fatin no hatama pedidu ba Ministériu Turizmu Komérsiu no Indústria (MTCI), atu oinsá liuhosi dalan legál hodi realiza mini-feira ne’e.

“Atividade ne’ebé ita prevee iha mini-feira ne’e mak kulinária, negósiu kiik no jogu bola guling. Atividade sira-ne’e mak ita tau iha mini-feira, liga ba selebrasaun restaurasaun independénsia ba dala-XX,” nia dehan.

Centro Juventude Becora hala’o atividade sira-ne’e, tanba Becora grupu barak hanesan grupu negósiu kiik, kulinária ho negósiu sira seluk tanba ne’e CJB no autoridade lokál akumula sira ne’e mai, hodi investe iha momentu importante ne’e.

“Alende ne’e, ita mós hakarak promove ita-nia produtu lokál sira, liga ba negósiu kiik, hortikultura no pekuária, sira-ne’e bele mai partisipa, atu oinsá ita haree no promove tanba ida ne’e ita-nia objetivu. Katak, ita hakarak hasa’e kresimentu ekonómia ba iha komunidade, liuhosi atividade ne’e,” Diretór Ezekutivu CBJ ne’e hateten.

Ho atividade ne’e, grupu sira mai hosi komunidade iha área Cristo Rei, hosi ne’e sira bele mai rejistu ho avontade tanba liuhosi rejistu mak sira bele mai faan sira-nia produtu iha ne’e, entaun horisehik halo ona abertura ba rejistu.

Daudaun ne’e, nia informa, grupu lima (5) mak mai aproxima ona katak sira atu mai rejistu, nune’e fó biban ba grupu seluk bele book an hodi tuir rejistu.

Kona-ba fatin, nia dehan, fatin ne’e konforme ba grupu se de’it mak hakarak mai investe sira-nia produtu, iha ne’e la taka dalan, tanba oportunidade ne’e loke ba ema hotu-hotu atu bele festeza loron boot ne’e liuhosi sira-nia partisipasaun iha mini-feira ne’e.

Kritéria ba grupu sira rejistu mak kada grupu mai rejistu ho $2, tanba ho $2 ne’e hanesan kontribuisaun ba komisaun organizadora no sira mós tenke iha dokumentu komprovativu hanesan iha kartaun eleitorál ne’ebé pertense ba postu admibnistrativu Cristo Rei.

“Ho kartaun eleitorál ne’e, atu ita hatene katak dadus ne’ebé rejistu ita bele akumula tama iha baze dadus iha organizasaun ka komisaun ne’ebé iha, atu ita bele asegura atividade sira ne’e,” nia esplika.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here