Ekipa intervistadór hala’o rekollamentu istória luta veteranu sira iha postu Baucau vila, tersa (10/05). Imajen Tatoli/Natalino Belo.

BAUCAU, 10 maiu 2022 (TATOLI) – Arkivu Muzeu Rezisténsia Timorense (AMRT) tersa ne’e, rekolla istória luta hosi veteranu na’in-25 iha postu administrativu Baucau Vila, munisípiu Baucau.

Diretór Ezekutivu ARMT, Hamar António Baptista Alves hateten, hafoin halo koordenasaun koordenadór ekipa iha postu Baucau vila iha fulan-marsu atu realiza intervista no rekolla dokumentu luta nian hanesan parte arkiva istória durante partisipasaun iha luta ba independénsia iha muzeu.

“Tuir koordenasaun ho veteranu sira atu rekolla testamuña no dokumentu sira-ne’ebé sira iha inklui identifika fatin sira-ne’ebé iha sentidu istóriku importantes,” Diretór Exekutivu AMRT informa ba Agência Tatoli iha Vila Nova, tersa ne’e.

Ekipa intervistadór hala’o rekollamentu istória luta veteranu sira iha postu Baucau vila, tersa (10/05). Imajen Tatoli/Natalino Belo.

Maneira intervista hanesan parte atu hatene informasaun loloOs kona-ba istória partisipasaun luta hosi kada veteranu sira-nian nune’e bele hakerek ba istória no diJitáliza iha muzeu nune’e futuru mai bainhira estudante sira presiza atu halo peskiza kona-ba istória luta Timor-Leste nian bele direitamente peskiza iha ARMT.

Alende ne’e, veteranu na’in-25 refere konkorda atu entrega mós dokumentu importante ba ARMT atu asegura hanesan karta guia da marsa, karta korrespondénsia no imajem ka foto ne’ebé iha rejiaun ho luta ukun-aan.

Hamar esplika, importante prezervasaun istória luta hosi veteranu sira-nia mak sai hanesan arkivu istóriku tanba objetivu mak partisipasaun individu durante luta no dokumentu objetu.

“Sé mak iha oportunidade, ohin loron bele rai hela ninia deklarasaun, pizajen tomak ba AMRT hanesan parte hosi kontribuisaun ba istória nasionál,” Hamar akresenta.

AMRT tuir planu sei halao atividade rekolla istória iha postu Baucau vila durante semana-ida ho sekuénsia programa hanesan dahuluk sei intervista no sei simu dokumentu hosi veteranu sira iha loron enseramentu.

Biban hanesan, Migeul Dias ‘Leki-Sahe’ nu’udar veteranu hateten nia parte prontu kolabora tanba hakarak konta istória no entrega dokumentu luta hodi prezerva muzeu rezisténsia nune’e bele arkiva no sei konta ba jerasaun foun iha futuru.

“Ha’u-nia istória ne’e importante atu oan sira hatene tanba ne’e tenke hakerek iha muzeu rezisténsia,” Leki-Sahe hateten.

Atividade hanesan sei realiza moó iha suku Bocoli, postu Baucau vila, suku Vemasse Tasi, postu Vemase, suku Bercoli, postu Venilale no ikus iha postu Baguia.

Tuir dadus, AMRT rekolla ona testamuña oral hamutuk na’in-800 resin, transkrisaun ona 400-resin, dokumentu fíziku rihun 50, dijitaliza ona rihun 30-resin, dijitaliza fotografia rihun 2 resin, klasifikasaun finál ba publikasaun online peskiza hamutuk rihun 16.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here