iklan

EKONOMIA, HEADLINE, MUNISÍPIU, OÉ-CUSSE (RAEOA)

Aduaneiru RAEOA rekolla reseita $60,912.55

Aduaneiru RAEOA rekolla reseita $60,912.55

Diretór Autoridade Aduaneiru RAEOA, José da Costa. Imajen Tatoli/Abílio Elo Nini.

OÉ-CUSSE, 10 maiu 2022 (TATOLI) – Autoridade Aduaneiru (AA/Alfándega) iha Rejiaun Administrativa Espesiál Oé-Cusse Ambeno (RAEOA) rekolla reseita ba kofre Estadu iha trimestre dahuluk 2022 hamutuk $60,912.55.

“Esforsu ne’ebé Alfandega rekolla reseita ba kofre Estadu iha trimestre primeiru ne’e hahú janeiru to’o marsu, Alfándega hetan $60,912.55, maski taxa ne’e tún maibé agradese tanba iha nafatin, tanba situasaun agora la hanesan tinan hirak liubá,” Diretór Alfándega RAEOA, José da Costa, hateten iha Oé-Cusse, tersa ne’e.

Nia informa, reseita iha trimestre dahuluk ne’e ki’ik tebes, kompara ho tinan 2019 ba kraik sa’e maka’as, tanba sasán tama kada loron tantu kalan no loron, no fronteira haat funsiona di’ak agora limita autoriza de’it fronteira Sakato.

Tuir nia, situasaun pandemia afeta tebes ba empreza sira atu halo importasaun barak ho tipu saida de’it, tanba aplikasaun Estadu emerjénsia autoriza sasán semana ida tama dala ida.

“Taxa ne’e la inklui portu no aeroportu, só importasaun liuhosi fronteira terrestre hosi fronteira Sakato, ba Oésilo Pássabe no Nítibe dezde COVID-19 la ativa tanba kondisaun dalan,” nia katak.

Nia fó-sai katak, fonte taxa ne’e kobre maioria importasaun nesesidade bázika no kontrusaun sivíl, tama kada semana, foin mak iha abríl to’o maiu maka Estadu autoriza importasaun tama kalan loron, nune’e nia espera taxa Alfándega to’o dezembru tinan ne’e sei aumenta, tanba inportasaun tama kada loron.

“Ita fi’ar katak, to’o dezembru taxa sei sa’e maka’as, iha-ne’e só tabaku laiha autorizasaun, kuandu hahán no nesesidade báziku seluk bele, no sasán eletrónika, inklui konstrusaun nian,” nia afirma.

Entretantu, totál funsionáriu ne’ebé servisu iha Autoridade Aduaneiru RAEOA hamutuk ema na’in-43, na’in-sia (9) permanente no kontratadu na’in-34.

Jornalista   : Abílio Elo Nini
Editór          : Evaristo Soares Martins

iklan
iklan

Leave a Reply

iklan
error: Content is protected !!