VIQUEQUE, 10 maiu 2022 (TATOLI)—Administradór munisípiu Viqueque, Januário Soares ‘Bolly’, hateten, administrasaun munisipál laiha orsamentu sufisiente atu rezolve ponte Beaço ne’ebé kotu iha dirasaun Viqueque vila liga bá postu administrativu Uatulari no Uatucarbau.
“Ponte ne’ebé kotu difikulta movimentu transporte rodoviáriu sira, maibé munisípiu laiha orsamentu iha kapitál dezenvolvimentu, karik iha ita bele rezolve,” Administradór hateten ba Agência Tatoli iha ninia knaar fatin, tersa ne’e.
Notísia relevante: Ponte Beaço kotu difikulta movimentu transpote públiku
Tuir Autoridade munisipál ne’e, pontu ho naruk metru hitu administrasaun munisipál bele foti desizaun hodi rezolve, maibé orsamentu la prevee ba tinan ne’e.
Nune’e, nia husu Servisu Ministériu Obra Públika (MOP) Viqueque hodi submete pedidu ba MOP nasionál hodi fó resposta ba kestaun ne’e.
“Ita haree ponte Beaço kotu kleur ona, transporte sira baibain liu iha ne’ebá sempre halai hosi mota laran maibé tempu udan transporte labele liu, sira tenki hein mota tun maka bele liu,” nia akresenta.
Jornalista : Vitorino Lopes da Costa
Editóra : Julia Chatarina
