Jornalista hosi Agência TATOLI, Hortencio Sanchez intervista hela Embaixadora Timor-Leste iha Vietname, Olandina Isabel Caeiro Alves iha edefisiu Embaixada Timor-Leste iha Vietaname, loron segunda (09/05). Imajen/Eggy Mbape

VIETNAME, 09 maiu 2022 (TATOLI)– Embaixadora Timor– Leste iha Vietname, Maria Olandina Isabel Caeiro Alves, informa pozisaun líder nasionál iha nasaun Vietname firme no laiha objesaun hodi apoia Timor-Leste sai membru Organizasaun Sudeste Aziátika (ASEAN, sigla Inglés).

“Ha’u nia misaun iha ne’e mak atu haree mós kona-ba prosesu atu ita sai membru ba ASEAN nian, maibé Vietname nasaun ida ne’ebé sempre apoia ita atu sai hanesan membru ASEAN, sira laiha obsesaun  no apoia totál ba ita atu tama ba membru ASEAN,” Embaxiadora ne’e hateten ba Agência TATOLI iha Vietname, segunda ne’e.

Diplomata timoroan ne’e dehan ekipa Fact Finding hosi ASEAN nian sei ba tan Timor-Leste hanesan faze ikusliu hodi haree ba pilar ekonomia, sosiál no kultural,  nune’e bele haree mós iha área defeza no seguransa.

“Ekipa ne’ebé sei ba halo avaliasaun ne’e Vietname rasik hola parte hotu iha laran no ida ne’e mak faze ikus liu, hein katak ho ida ne’e ita avansa tan ona, tanba nasaun hotu iha ASEAN ne’e kuaze fó sira nia apoia,” nia afirma.

Nune’e, Olandina Caeiro iha esperansa tinan ida tan Timor-Leste bele hola parte loloos ona hanesan membru ASEAN.

“Ita bele ona atu tama hanesan membru tanba preparadu ona, iha rai balu mak uluk seidauk preparadu maibé sira tama ona,” nia afirma.

Pedidu adezaun nian haruka ona iha tinan 2011, nune’e hanesan kestaun tempu nian de’it to’o Timor-Leste ba hamutuk ho ninia feton no naan sira iha família ASEAN nian.

Tuir jeografia Timor-Leste sítua iha Sudeste Aziátiku, ne’ebé rekoñese nu’udar Estadu ida ne’ebé soberanu husi nasaun membru hotu organizasaun ne’e nian, dispostu atu respeita karta ASEAN nian no prontu  atu kumpre obrigasaun kona-ba adezaun nian,Timor-Leste prenxe kritéria ne’ebé hatuur tiha ona. Admisaun ne’e hetan desizaun liuhusi konsensu iha Simeira, liuhusi rekomendasaun Konsellu Koordenasaun Asosiasaun  nian.

Hahú kedas iha tinan 2011, faze preparasaun nian balun inklui tiha ona programa sira nivel nasionál ba sensibilizasaun instituisaun sira nian no sosiedade sivíl kona-ba matéria ne’e, harii pontu fokál sira no Sekretária Estadu ba Asuntu sira ASEAN nian, reforsa kompeténsia liuhusi formasaun no diálogu, partisipasaun iha Forum Rejionál no iha  sorumutuk rejionál no globál sira seluk, harii no reforsa embaixada sira Timor-Leste nian iha nasaun hotu-hotu organizasaun nian.

Iha Governu nia laran, introdusaun no aplikasaun kona-ba “Modelu sira ASEAN nian” (“ASEAN Blueprints”) iha dezenvolvimentu polítika nasionál nian garante hela katak, polítika foun sira no kuadru regulamentár sira integra tiha ona ho modelu sira husi organizasaun nian.

Tinan ne’e, Ministériu Negósiu Estranjeiru no Kooperasaun sei konklui análize ida luan ne’ebé kona-ba polítika sira hotu no kuadru regulamentár atuál sira Timor-Leste nian, ne’ebé sei aprezenta ba Konsellu Ministrus hodi halo aprovasaun.

Elaborasaun dokumentu, ne’ebé koñesidu ho Memorandu kona-ba Rejime Komérsiu Esternu, hatudu to’o iha pontu ne’ebé maka Timor-Leste deside ona hodi prenxe rekizitu sira ASEAN nian. Iha nia mak sei define pasu sira ne’ebé maka tenkesér foti hodi alkansa konfomidade kompleta ho buat ne’ebé pratika iha Asosiasaun.

Nune’e, Sekretariadu no membru sira organizasaun Nasaun Sudeste Aziátiku nian sei bele komprende ho di’ak estadu atuál enkuadramentu nasionál nian sira, hodi hatudu prontidaun no esforsu sira ne’ebé Timor-Leste halo ona to’o ohin loron, atu prepara an didi’ak hodi asumi obrigasaun sira nu’udar membru Asosiasaun nian.

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here