Seremónia destaka estudante parteira estajiáriu komunitáriu, iha suku Ossu de Cima, segunda (09/05). Imajen Tatoli/Vitorino Lopes da Costa

VIQUEQUE, 09 maiu 2022 (TATOLI)—Univesidade Nasionál Timor-Lorosa’e (UNTL) destaka estudante parteira estajiáriu na’in-106 iha postu administrivu Ossu, munisípiu Viqueque, durante fulan-rua hahú loron 09 maiu to’o jullu, hodi halo atendimentu ba komunidade.

Reitór UNTL, João Soares Martins,  husu  estudante estajiáriu komunitáriu hosi fakuldade medisina, departamentu parteira, atu aproveita oportunidade hakbesik ba komunidade hodi hatene problema sosiál, liuliu ba inan isin-rua sira.

“Durante ne’e estudante sira apreende teoria iha eskola maibé agora mai prátika direta iha komunidade sira-nia le’et hodi buka hatene problema saida de’it maka sira enfrenta, nune’e bele koñese sosiadade ninia moris no karakterístika hodi aban bain-rua bainhira hala’o serbisu bele hatene ona kondisaun,” Reitór hateten ba Agência Tatoli, hafoin serimónia destaka estudante estájiu komunitáriu, iha suku Ossu de Cima, postu Ossu, segunda   ne’e.

Notísia relevante: MS enkoraja Parteira sira mellora atendimentu ba inan no oan

Nia dehan, atividade ne’e ho intensaun hodi hasa’e estudante sira-nia koñesimentu molok graduasaun.

Iha biban hanesan, Administradór postu Ossu, Sebastião Pereira Pires, agradese ba inisiativa universidade públika no konsidera prezensa estudante parteira importante tebes, ne’ebé bele ajuda komunidade lokál hanesan fó atendementu ba inan isin-rua no foti dadus ruma hosi inan sira.

“Ha’u haree durante ne’e Governu ladún fó atendimentu di’ak ba kominidade. Ida-ne’e ami sente prioridade tebes ba komunidade Ossu, liuliu inan sira-nia difikuldade, nune’e líder komunitáriu ka liman ain Governu bele estuda no hatene,” nia akresenta.

Durante ne’e, estudante UNTL hosi fakuldade seluk maka halo estájiu iha munisípiu Viqueque, enkuantu fakuldade siénsia medisina foin dauluk destaka iha munisípiu ne’e.

“Tanba ne’e, ha’u husu UNTL se bele tinan oin nafatin destaka estudante medisina sira mai hala’o estájiu iha ne’e hodi fó atendementu ba ami-nia komunidade,” nia tenik.

Nune’e, Administradór postu husu xefe suku Ossu de Cima no xefe suku Builale hodi kolabora ho estudante sira hodi bele haree problema komunidade.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here