Ekipa Polísia Siéntifika Investigasaun Kriminál (PSIK) haloot bebé nia-isin mate hodi tula ba karreta laboratóriu nian lori kedas ba Hospitál Nasionál Guido Valadares (HNGV). Imajen Tatoli/Felicidade Ximenes.

DILI, 09 maiu 2022 (TATOLI)— Polisia Siéntifika Investigasaun Kriminál (PCIC, sigla portugés), detein suspeita ka autora ne’ebé soe bebé iha lixeira área Aitarak-Laran, aldeia Haburas, suku Motael, Postu Administrativu Dom Aleixo, Munisipiu Dili.

Ekipa Saneamentu Munisípiu Dili ne’ebé loro-loron hala’o atividade rekolla lixu, iha domingu tuku 10h00 dadeersan ne’e, hetan bebé mane ida-ne’ebé ema soe no hatoba hela iha plástiku ida-nia laran, iha lixeira Aitarak Laran, Dili.

Notísia Relevante: Uma Kreda lamenta ho inan soe bebé

Hafoin, PCIC simu informasaun hosi komunidade iha área Aitarak-Laran katak hetan  bebé mane ida ho kondisaun mate iha lixeira,  Ekipa PCIC tuun hodi asegura bebé nia mate-isin hodi lori ba autópsia iha Hospitál Nasionál Guido Valadares (HNGV).

Portavós PCIC, Octávio da Costa Araújo, dehan hafoin akontesimentu ne’e ekipa PCIC kontinua buka tuir lokalizasaun autór  ne’ebé maka so’e bebé.

“Durante oras lima nia laran horisehik, ita lokaliza no kaptura kedan autora ne’ebé maka so’e bebé refere iha area Dili laran, ho inisiál MJ ho idade 18, hosi Munisípiu Bobonaro, nia nuudar bebé nia inan-rasik. Suspeitu ne’e foin hela iha Dili fulan rua,” Portavóz PCIC ne’e hateten liuhosi konferénsia Imprensa ne’ebé hala’o iha edifisiu PCIC, Caicoli, segunda ne’e.

Nia dehan, kazu ne’e la’ós fragante delitu, entaun PCIC só halo de’it auto notisia hodi enkamiña ba iha parte Ministériu Públiku hodi prosesa tuir lei ho asaun penal ho krime infantesidu, iha artigu 142 hosi Kódigu Prosesu Penál Timor-Leste.

“Ita seidauk bele halo investigasaun ba bebé nia inan atu hatene kle’an kona-ba motivu hosi kazu ne’e rasik,” nia afirma.

Tanba, Octávio dehan hafoin halo kapturasaun ba suspeitu, PCIC transporta ona autora ne’ebé so’e  bebé ba  iha HNGV, hodi halo tratamentu saúde tanba nia  foin mak partu ne’ebé ran sai makas. Nune’e hein rekupera mak foin halo investigasaun kle’an ba kazu ne’e. 

Notísia Relevante: PR Lú Olo: Justisa Tenke Sériu Julga Kazu Soe Bebé

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here