Vise-Ministru Finansa, António Freitas. Imajen Tatoli/Egas Cristóvão

DILI, 09 maiu 2022 (TATOLI)—Vise-Ministru Finansa, António Freitas, promete pagamentu liña frente ba jornalista sei realiza iha semana ida-ne’e nia laran.

“Ha’u sei konfirma ho Diretór Jerál Tezouru, karik dokumentu to’o ona iha ne’ebá, ha’u promete ba ita-boot sira la to’o loron-tolu, maibé seidauk karik ha’u sei konfirma fali ho Ministériu Asuntu Parlamentár no Komunikasaun Sosiál (MAPKOMS),” Vise-Ministru informa iha salaun Rudal, Hudi-laran, segunda ne’e.

Notísia relevante: MAPKOMS sei submete hikas lista jornalista liña frente ba MF

Nia konfirma, MAPKOMS hanesan ministériu tutela submete ona dokumentu ba Ministériu Finansa (MF).

“Agora kedan ha’u telefone ba Diretora Jerál Tezouru atu konfirma prosesu verifikasaun dadus ka lista jornalista sira to’o ona iha ne’ebé, tanba Ministériu Finansa hanesan instituisaun finál, ne’ebé asuntu kona-ba pagamentu liña frente presiza halo konfirmasaun tanba na’in loloos ne’e maka MAPKOMS no apropriadu liu ministériu ne’e mak tenke resposta,” nia akresenta.

Tuir governante ne’e, prosesu ne’e kleur tanba uza orsamentu Estadu no Governu liuhosi MF presiza haree rekizitu sira, maibé la signifika atu trava direitu ba jornalista sira.

“Tanba atu hetan pagamentu ba liña frente ne’e tenke kompleta uluk rekezitu atu nune’e bainhira pagamentu la’o ona labele mosu fali problem seluk. Bainhira osan to’o karik ita-boot sira mós sei gasta ho didi’ak no Ministériu Finansa ne’ebé halo pagamentu ne’e bele hala’o ninia knaar ho responsabilidade tanba auditoria sei tun mai ami, ida ne’ebé fó maka sei responsabiliza. Tanba ne’e mak ami husu ba ita-boot sira atu pasiénsia,” nia akresenta.

Aleinde ne’e, Vise-Ministru dehan bainhira dokumentu sira prienxe ona rekizitu signifika iha ona baze legál.

“Espera katak konta bankária benefisiáriu nian maka tenke klaru, bainhira loos hotu ona mak sei la liu semana ida-ne’e,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here