Vise Sekretáriu Jerál AETL, Zeremias da Cruz, akompaña Diretór Klíniku HNGV, Marcelino Correira, foto hamutuk ho Dosente hosi Universidade sira no konvidadu sira seluk. Imajen/Mídia HNGV.

DILI, 09 maiu 2022 (TATOLI)— Asosiasaun Enfremeiru Timor-Leste (AETL), segunda ne’e, komemora loron Mundiál Enfremeira ba tinan 100 ho tema “Investe iha área Enfermajen no respeitu direitu no atu asegura saúde globál”, iha Hospitál Nasionál Guido Valadares (HNGV).

Biban ne’e, Vise Sekretáriu Jerál AETL, Zeremias da Cruz, hateten selebrasaun loron mundiál ba Enfremeiru ne’e importante tebes atu ba oin asosiasaun kontinua nafatin hadi’a kualidade atendimentu ba populasaun iha fasilidade saúde sira.

“Asosiasaun husu nafatin ba profisionál saúde liuliu Enfremeiru sira ne’ebé serbisu iha instituisaun Estadu no Privadu atu fornese atendimentu ho kualidade no minimiza problema sira ne’ebé durante ne’e populasaun sira kestiona iha mídia,” Vise Sekretáriu Jerál ne’e hateten hafoin ramata serimonia iha HNGV-Bidau, segunda ne’e.

AETL rejista iha Ministériu Saúde ho membru 1.000-resin, hosi númeru ida ne’e la inklui sira ne’ebé mak servisu iha fasilidade privadu no barak liu mak servisu iha postu saúde no sentru saúde too HNGV.

Ezijénsia hosi mundu no Organizasaun Mundiál Saúde atu mínimu Enfermeiru ho ninia nivél edukasaun tenke too iha diploma III, nune’e AETL rasik halo ona negosiasaun ho Ministériu Saúde no rezultadu iha ona katak enfermeiru na’in-90  mak ho nivél Eskola  Enfermajen Saúde  (SPK,sigla Indonézia) atu kontinua sira nia estudu iha Universidade Nasionál Timor Lorosa’e (UNTL).

“Ita sei kontnua nafatin ita-nia membru sira ne’ebé servisu iha fasilidade saúde atu   hetan diploma III iha Universidade Nasionál Timor-Leste (UNTL),” nia kompromete.

Iha fatin hanesan, Diretór Klíniku HNGV, Marcelino Correira, informa Enfermeiru   sira ne’e importante tanba servisu loro-loron iha fasilidade saúde hodi atende pasiente sira hodi bele rekupera.

“Sai enfermeiru tenke servisu di’ak hodi atende pasiente sira hodi ajuda ema ne’ebé mak presiza ita-nia tulun liuhosi atendimentu ne’ebé mak loron-loron ita halo,” nia afirma.

Partisipa iha seremonia komemorasaun loron mundiál Enfremeiru mak estudante hosi Universidade Nasionál Timor Lorosa’e (UNTL), Institutu Siénsia Saúde (ICS), UNDIL, UNITAL, no Institutu Superiór Cristal no konvidadu sira seluk.

Notísia relevante:MS enkoraja Parteira sira mellora atendimentu ba inan no oan

Jornalista : Felicidade Ximenes

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here